Aqtaýda sheteldik 1 kelige jýyq apıyndy jutyp, elge ótkizbek bolǵan
ASTANA. KAZINFORM — Aqtaý áýejaıynda esirtki kapsýlalaryn jutyp qoıǵan adam ustaldy, dep habarlaıdy UQK baspasóz qyzmeti.
Ulttyq qaýipsizdik komıteti esirtki quraldarynyń zańsyz aınalymyna qarsy is-qımyl jónindegi jumysty jalǵastyryp keledi.
Bıylǵy jyldyń sáýir aıynan bastap esirtki jetkizýdiń 9 halyqaralyq jáne 2 óńirlik arnasy joıyldy, 1 fıtozerthananyń qyzmeti zalalsyzdandyryldy.
Aqtaý qalasynyń áýejaıynda jalpy salmaǵy 1 keli bolatyn 114 apıyn kapsýlasyn denesinde ótkizýge árekettengen sheteldik azamat ustaldy.
Elorda áýejaıynda Ońtústik Azııa elderiniń birinen 12 kg gashısh maıyn jetkizgen qazaqstandyq ustaldy.
Budan bólek, iri kólemdegi «kóknár sabaǵyn» kontrabandalyq jolmen alyp ótýge jáne taratýǵa, sondaı-aq atalǵan shıkizattan esirtki quraldaryn óndirýge kúdikti adamdardyń turaqty qylmystyq tobynyń quqyqqa qaıshy áreketiniń joly kesildi.
— Barlyǵy 3,4 kg apıyn, 9 kg gashısh, 11,4 kg sıntetıkalyq esirtki, 18,5 kg gashısh maıy, 26,4 kg marıhýana, 110 g kokaın jáne 20 tonna kóknár sabany, sondaı-aq 150 lıtrden astam prekýrsor tárkilendi. Atalǵan quqyq buzýshylyqtardy jasady degen kúdikpen QR 23 azamaty jáne 3 sheteldik ustaldy. Atalǵan faktiler boıynsha sotqa deıingi tergep-tekserý júrgiziledi, — delingen habarlamada.
Budan buryn Almatyda esirtki saýdasymen aınalysqan úsh aǵaıyndy ustalǵanyn jazdyq.
