Aqtaýda shahtaǵa qulaǵan lıft: Jaýapty mekeme oqys oqıǵa boıynsha pikir bildirdi
Esterińizge sala keteıik, qaıǵyly jaǵdaı Aqtaýdaǵy 17 shaǵynaýdan Aktau Plaza turǵyn úı kesheninde bolǵan.
Turǵyndardyń aıtýynsha, 25 qyrkúıek kúni keshki saǵat 19:30 shamasynda ishinde adamdary bar lıft shahtaǵa qulaǵan.
Eshkim zardap shekken joq. Turǵyndar bir-birine kómektesip, shahtadan shyqqan.
Atalmysh oqıǵa kezinde lıftide kishkentaı balalar, jas analar bolǵan.
Olar lıftiniń isten shyǵýy birinshi ret emes dep shaǵymdandy.
«Aqtaý qalalyq lıftileri»JShS quryltaıshysy Kópbergen Jaılıev málimetinshe turǵyn úıdiń lıfti turǵyndardyń ótinishi boıynsha barlyq erejelerge qaıshy qosylǵan.
Ol qajetti synaqtardan ótpegen jáne paıdalanýǵa berilmegen.
Túrik óndirisindegi lıftini jetkizýge jáne montajdaýǵa arnalǵan shart 2019 jyly jasaldy. Lıftini montajdaý jumysy 2020 jyly aıaqtaldy.
«Barlyq qujattardy qurylys salýshyǵa tapsyrdyq. Olar óz atynan paıdalanýǵa berýge ótinish berýi kerek edi. Biraq bul qujattar úıdi salýshylarda boldy. Olar úıdi tolyq aıaqtamaı jatyp adamdardy qonystandyrdy. Turǵyndar lıft qosýdy suraı bastady. Óıtkeni altynshy, jetinshi qabattarda qart adamdar turady. Biz zańǵa qaıshy keldik. Úıdi tolyq paıdalanýǵa ruqsat berilgenge deıin lıftini iske qospaý kerek edi. Biz turǵyndarǵa jeńildik jasaǵanymyzǵa kinálimiz», - dedi «Aqtaý qalalyq lıftileri» JShS quryltaıshysy Kópbergen Jaılıev.
Paıdalanýǵa tapsyrar aldynda mamandar lıftiniń qaýipsizdigin tekserýi kerek edi. Biraq bul jumystar jasalǵan joq. Óıtkeni qurylys salýshy áli tirkeýge ótinish bermegen edi.
Mamandar tótenshe jaǵdaıdyń sebebi shamadan tys júkteme bolýy múmkin dep boljaıdy.
Vıdeoda kóringendeı, oqys oqıǵa kezinde lıftiden alty eresek adam men jas balalar shyǵyp jatty.