Aqtaýda Sh. Bóltekulynyń qurmetine V-shi halyqaralyq boks týrnıri ótti
ASTANA. Tamyzdyń 23-i. QazAqparat - Keshe, jeksenbi kúni Aqtaý qalasynda KSRO-nyń sport sheberi, qazaq boksynyń negizin qalaýshylardyń biri Shoqyr Bóltekulynyń qurmetine arnalǵan V-shi halyqaralyq boks týrnıri aıaqtaldy,
dep habarlaıdy QazAqparat.
Tórt kúnge sozylǵan dodada Sırııa, Qytaı, Ázirbaıjan, Túrikmenstan, Ýkraına, Moldova, Ózbekstan, Qyrǵyzstan, Reseı jáne Qazaqstan boksshylary qolǵap túıistirdi. Jarys 10 salmaq dárejesi boıynsha ótti.
Atalǵan týrnırde jeńimpazdar qatarynda qazaqstandyqtardyń úlesi basym boldy. Almaty oblysynan kelgen Mardan Berikbaev 49 kılá salmaq dárejesinde birinshi oryn ıelense, 52 kılá salmaqta mańǵystaýlyq Álı Baıbuzov myqty atandy.
56 kılá salmaqta Aqmola oblysynyń boksshysy Jandos Momynov, 60 kılá salmaqta Aqtóbe oblysynyń sportshysy Berik Ábdirahmanov eshkimge des bergen joq.
Al 64 kılá salmaq dárejesinde Ázirbaıjannan kelgen Gaıbatýlla Gadjıalıev oljaly bolsa, astanalyq Baqytjan Qojabek 69 kılá salmaqta, Mańǵystaý oblysynyń boksshysy Ádilbek Nııazymbetov 75 kılá salmaq boıynsha jeńimpaz boldy.
Al qalǵan aýyr salmaq dárejeleri boıynsha oryndar sheteldik qonaqtarǵa buıyrdy. Olar: qyrǵystandyq Shyńǵys Borbashev (81kılá), sırııalyq Mohammad Gossýn (91kılá), Ýkraına boksshysy Rostıslav Arhıpenko (91-den joǵary).
Jarystyń bas tóreshisi AIBA uıymynyń halyqaralyq sanattaǵy tóreshisi Serik Ábdenálıev boldy.
Sh.Bóltekuly 1916 jyly Mańǵystaý oblysynda dúnıege kelgen. Bokspen stýdent kezinde shuǵyldana bastaǵan ol qazaq jerinde áýesqoı boksty úıretýdi eń birinshi qolǵa alǵan ustaz. Qazaq boksynyń atasy atanǵan Sh.Bóltekuly - QR eńbek sińirgen jattyqtyrýshysy, KSRO sport sheberi atanǵan tuńǵysh qazaq.
