Aqtaýda saıabaqta attraktsıon beldigi úzilip ketti
MAŃǴYSTAÝ. QazAqparat - Aqtaýdaǵy «Aqbota» saıabaǵynda qosylyp turǵan attraktsıondardyń biriniń beldigi úzilip ketti, dep habarlaıdy QazAqparat tilshisi.
Abyroı bolǵanda, ol bos bolyp, adam shyǵyny tirkelmedi.
Oqys oqıǵany sol jerde júrgen turǵyn uıaly telefonyna túsirip alyp, ınstagramm paraqshasyna jarııalaǵan. Ol jazbasynda: «Abaılańyzdar. Ata-analardy eskertkim keledi. Búgin sińlim qyzymen birge «Aqbota» saıabaǵynda serýendep, oınaǵysy kelgen. Átkenshekterdi qosyp otyratyn operator balalardy otyrǵyzyp, beldikterin taǵyp, qosyp ketip qaldy. Biraq, bos orynnyń beldigin taqpaǵan eken. Átkenshek oınaı bastaǵanda, bos oryndyqtyń qatty beldigi úzilip, jerge túsip qaldy. Abyroı bolǵanda eshkim zardap shekken joq. Biraq sol qatty beldik nemese oryndyq balaǵa qulaǵanda ne bolatyn edi? Saıabaqtyń basshylyǵy qaıda qarap otyr? Bir jaǵdaı bola qalsa, olar tek aıyppul tólep qutylady, al balańyzdy qaıtara almaısyz», dep jazdy.
Osy oqıǵaǵa qatysty tótenshe jaǵdaı departamenti mamandary tarapynan tekserý júrgizilgen.
Aqtaý qalalyq kásipkerlik jáne aýyl sharýashylyq bóliminiń basshysy Demeýǵalı Baqovtyń aıtýynsha, attraktsıondy qosyp, ketip qalǵan operatordy jumystan bosatý týraly usynys tastap, shara qoldanǵan.
«Saıabaqta jumys jasaýǵa tek 3 kásipkermen ǵana kelisimshart bar. Olarǵa eskertý jasalyp, osyndaı jaǵdaı qaıtalansa, ruqsatynan aıyrylyp, kelisimshart toqtatylatyny týraly xat joldandy»,-deıdi Demeýǵalı Baqov.
Osy jaǵdaıdan keıin saıabaqtaǵy jumysshy operatorlar oqý daıyndyǵynan ótpek. Endi olarǵa arnaıy kıimder beriledi.
Qazir «Aqbota» saıabaǵynda 14-ten astam attraktsıon bar. Tehnıka Reseıden ákelingen. Bolashaqta taǵy da átkenshekter alynbaq.
Aıta keteıik, «Aqbota» saıabaǵy memleket menshiginde. Osydan 3-4 jyl buryn qańyrap bos jatqan jer bolsa, byltyrdan bastap abattandyrylyp, kásipkerler shaqyrylǵan.
