Aqtaýda sarbazdyń soqqyǵa jyǵylýyna baılanysty tergeý jumystary júrgizilip jatyr
ASTANA. QazAqparat - Jedel áskerı qyzmettegi sarbaz Dáýlet Áshirovty soqqyǵa jyqty degen kúdikpen onyń 25744 áskerı bólimindegi qyzmettesi tergelip jatyr, dep habarlaıdy «Lada» QR Qorǵanys mınıstrligine silteme jasap.
Mınıstrlik habarlaǵandaı, Aqtaý gornızonynyń áskerı polıtsııasy sotqa deıingi tergeýdi QR QK 440-babynyń 3-bóligi 4-pýnktindegi qylmystyq belgilerge sáıkes júrgizýde.
«25744 áskerı bóliminde jedel áskerı qyzmette júrgen qatardaǵy jaýynger J. 2017 jyldyń 23 qarashasynda kúdikti dep tanylyp tergeýge alyndy. Qajetti tergeý amaldary júrgizilip, birqatar saraptamalar jasaldy. Qatardaǵy jaýynger J-ǵa qatysty saraptama nátıjeleri daıyn bolǵan soń, qylmystyq is sotqa jiberledi»,-dep habarlaıdy vedomstvo.
Eske sala keteıik, ásker qataryna 2017 jyldyń kókteminde shaqyrylǵan Aqtaýdaǵy jedel áskerı qyzmet sarbazy Dáýlet Áshirov 20 qarasha kúni oryndyqpen jasalǵan soqqynyń saldarynan es-tússiz aýrýhanaǵa jetkizilgen. Ol jeltoqsan aıynda ǵana esin jınady, ázirge jaǵdaıy aýyr. Jaýynger kúrdeli em-sharalardan ótý úshin Astanaǵa jetkizildi.
