Aqtaýda sarbaz irińdi menıngıtten kóz jumdy
ASTANA. QazAqparat - Aqtaýda sarbaz irińdi menıngıtten kóz jumdy, dep habarlaıdy Lada.
Otan aldyndaǵy boryshyn ótep jatqan sarbaz 14 qazan kúni tańerteń jan tapsyrǵan. Bul týraly Mańǵystaý oblysy Densaýlyq saqtaý basqarmasynyń baspasóz hatshysy Azamat Sarsenbaev málim etken.
Sarbazdy emdeýge tájirıbeli dárigerler tartylǵan, alaıda ony qutqarý múmkin bolmady.
«Sarbaz qaıtys boldy, onyń mıy 9:33-te jumysyn toqtatty», - delingen habarlamada.
Aıta keteıik, merzimdi qyzmettegi sarbaz 30 qyrkúıek kúni irińdi menıngoentsefalıt dertimen Mańǵystaý oblystyq aýrýhanasyna jatqyzylǵan bolatyn.
6656 áskerı bóliminde osy oqıǵaǵa baılanysty karantın jarııalandy. Sarbazben birge boryshyn ótep júrgen alty jigit ile-shala aýrýhanaǵa jatqyzyldy, alaıda kóp ýaqyt ótpeı olar shyǵaryldy.
