Aqtaýda sambo jáne jaýyngerlik sambo kúresinen halyqaralyq týrnır ótedi
NUR-SULTAN. QazAqparat - Aqtaýda ótetin Sambo jáne jaýyngerlik sambo kúresinen VI Halyqaralyq týrnırge 200-ge jýyq sportshy qatysady. Bul týraly Óńirlik kommýnıkatsııalar qyzmeti alańynda ótken brıfıngte Mańǵystaý oblystyq Sambo federatsııasynyń prezıdenti Aıdos Aqjanov málimdedi, dep habarlaıdy QazAqparat.
Mańǵystaý Arena sport kesheninde 3 tamyz kúni 23 jasqa deıingi balýandar aarsynda jaýyngerlik sambodan Qazaqstan Respýblıkasynyń chempıonaty, al 4-5 tamyz aralyǵynda Sambo jáne jaýyngerlik sambo kúresinen erler jáne áıelder arasynda Mańǵystaý oblysynyń sambo federatsııasynyń Kýbogine arnalǵan VI Halyqaralyq týrnır ótpek.
Týrnırdiń basty maqsaty - jastardy sportqa baýlý, salaýatty ómir saltyn nasıhattaý, sambo men jaýyngerlik sambony damytý jáne qatysýshylardyń sporttyq sheberligin arttyrý.
«Alǵashqy kúnderi ótetin chempıonatqa 100-ge jýyq óz elimizdiń samboshylary qatyssa, 4-5 tamyz aralyǵynda ótetin Mańǵystaý oblysynyń sambo federatsııasynyń Kýbogyna arnalǵan VI Halyqaralyq týrnırge 200-ge jýyq sportshy, elimizdiń túkpir-túkpirinen jáne Ózbekstan, Qyrǵyzstan, Tájikstan elderinen balýandar qatysýǵa ótinish bildirdi. Ár oblystyń myqtylary men shetelderde júldeger atanyp júrgen samboshylarymyz qatysatyn baıraqty básekeniń tartysty ótetini belgili. Jastar jylyna oraı uıymdastyrylyp otyrǵan sharaǵa Mańǵystaýlyqtar da tyńǵylyqty daıyn dep oılaımyn», - dedi Sambodan Qazaqstan Respýblıkasynyń memlekettik jattyqtyrýshysy Qaımen Esenamanuly.
Sońǵy 2018-2019 jyldary mańǵystaýlyq samboshylar álem chempıonatynan 10, Azııa chempıonatynan 11 medalǵa ıe boldy. Sport sheberine úmitker ataǵyn 80 sportshy alsa, 14 sportshy Qazaqstan Respýblıkasynyń sport sheberi ataǵyn qorǵady. 1 sportshy Halyqaralyq dárejedegi sport sheberi ataǵyna ıe boldy.
2018 jyly Sambodan jasóspirimder arasynda Reseı eliniń Rıazan qalasynda ótken jarysta mańǵystaýlyq Nursultan Jubatqan, Tóreken Qoblanov, Dáýren Tólegenov, Abylaı Qabylqaq altynnan alqa taqty. Budan bólek, mańǵystaýlyq samboshylar jasóspirimder arasynda Bishkekte jáne Bakýda ótken halyqaralyq jarysta birinshi komandalyq oryndy ıelendi.
Qazirgi tańda sambo sporty Mańǵystaý oblysynda keńinen tarap, oń nátıjeler kórsetýde. Sport basqarmasy tarapynan kúrdeli jumystar atqarylyp, sportshylar sany artýda. Jan-jaqtan kásibı jattyqtyrýshylar da tartylyp jatyr. Mańǵystaýda Sambo kúresinen halyqaralyq jarystarda tórelik etip júrgen ekstro klass tóreshi Berik Jumaǵalıev, halyqaralyq dárejedegi tóreshi Janbolatuly Aıbek jáne Qazaqstan Respýblıkasynyń ulttyq dárejedegi tóreshisi Janǵalı Nurdaýletov atalǵan týrnırde tórelik etetin bolady.
Aıta keteıik, osy jarysta jeńiske jetkender sport sheberi ataǵyna ıe bolady.
