Aqtaýda salynyp jatqan oralmandardy beıimdeý jáne kiriktirý ortalyǵynyń quny 1 mlrd. teńgeni quraıdy

Bul derekti QR Eńbek jáne halyqty áleýmettik qorǵaý mınıstrligi Kóshi-qon komıtetiniń tóraǵasy Qabylsaıat Ábishev www.bnews.kz portalynda ótken Online-konferentsııa barysynda aıtty, dep habarlaıdy QazAqpart.

 Onyń sózine qaraǵanda, halyqaralyq talapqa tolyǵymen saı keletin ortalyqtyń dárigerlik qosyny, sport zaldary, basseıni bolady. Q. Ábishev sonymen qatar el ekonomıkasynyń áleýeti jetip, memleketimizdiń kúsh-qýaty budan da arta tússe, ár oblysta osyndaı ortalyqtardyń salynatynyna úmiti bar ekendigin de jetkizdi.

 «Jalpy «Nurly kósh» baǵdarlamasynyń basty maqsaty - oralmandardy beıimdep, qoǵamǵa sińirýdiń jeńil jolyn tabý. Sondaı-aq atalǵan baǵdarlama boıynsha toptap, ıaǵnı 150-200 otbasynan ornalastyrý kózdelgen. Osyndaı maqsatpen kelesi  jyly 6 joba júzege asady. Bul qandastarymyzdyń ár jerde túrtpektep júrmeı, bir-birimen kórshi bolyp, ózderin-ózderi basqaryp, tildik ortalyǵy bir bolsyn, aǵaıyn-týysymen birge kelsin degen oıdan týyndaǵan», dedi ol.