Aqtaýda salyq esebine tirkelmegen 1454 bıznes nysany anyqtaldy
AQTAÝ. KAZINFORM — Aqtaý qalasynda salyq organdarynda esepke alynbaǵan 1454 kásipkerlik nysan anyqtaldy. Bul týraly Mańǵystaý oblysy boıynsha Memlekettik kirister departamenti málimdedi.
Mamandar kásipkerlik belgileri bar nysandardy elektr energııasyn tutyný derekteri negizinde anyqtaǵan, ıaǵnı, atalǵan mekenjaılarda kásipkerlik qyzmettiń belgileri bolǵanymen, olar salyqtyq esep júıesinde tirkelmegen.
— Anyqtalǵan nysandardyń qatarynda dúkender, dámhanalar, sulýlyq salondary, sheberhanalar jáne basqa da kásipkerlik nysandar bolýy múmkin. Alaıda salyq esebinde tirkeýdiń bolmaýy kásipkerlerdiń barlyǵy salyq tóleýden jaltaryp otyr degendi bildirmeıdi, — deıdi mamandar.
Máselen, nysannyń ıesi aýysýy, kásipkerlik qyzmettiń basqa adamnyń atyna rásimdelýi nemese mekenjaı týraly málimetterdiń naqtylanýyn qajet etýi yqtımal. Sondyqtan árbir jaǵdaı jeke tekserýdi talap etedi.
Aqtaý qalasy ákimdiginiń baspasóz qyzmetiniń habarlaýynsha, qazirgi ýaqytta kásipkerlerge zańnama talaptary men salyqtyq mindettemelerdi oryndaý tártibi túsindirilip jatyr.
Ýákiletti organdar bıznes ıelerin salyq organdarynda ýaqtyly tirkelip, zańnamada kózdelgen salyqtar men mindetti tólemderdi tóleýge shaqyrady.
Buǵan deıin Aqtaýda Kaspıı jaǵalaýyndaǵy zańsyz berilgen jerler memleketke qaıtaryldy.
