Aqtaýda salyq bereshegi bar kólikterge kezekti reıd júrgizildi
ASTANA. KAZINFORM — Aqtaý qalasynda salyq bereshegi bar kólik ıelerin anyqtaý jáne bıýdjetke tólenetin mindetti tólemderdiń ýaqytyly oryndalýyn qamtamasyz etý maqsatynda kezekti reıd ótti, dep habarlaıdy qala ákimdiginiń baspasóz qyzmeti.
Іs-shara Mańǵystaý oblystyq jeke sot oryndaýshylarynyń óńirlik palatasy, Aqtaý qalalyq ekonomıka jáne bıýdjettik josparlaý bólimi, Aqtaý qalasy memlekettik kirister basqarmasy jáne Mańǵystaý oblystyq polıtsııa departamentiniń Ákimshilik polıtsııa basqarmasynyń birlesýimen uıymdastyryldy.
Memlekettik kirister basqarmasynyń málimetinshe, 2025 jylǵy qarasha aıyna deıin 8 938 jeke tulǵanyń bıýdjet aldyndaǵy bereshegi shamamen 680 mln teńgeni qurap otyr.
Salyq mindettemelerin merziminde oryndamaǵan jaǵdaıda sot sheshimi negizinde birqatar shekteýler engizilýi múmkin. Atap aıtqanda, banktik shottardyń buǵattalýy, elden shyǵýǵa tyıym salý, kólikti qaıta rásimdeýge nemese satýǵa shekteý, sondaı-aq ákimshilik jáne qylmystyq jaýapkershilikke tartý syndy sharalar qarastyrylǵan.
— Qala turǵyndary men avtokólik ıelerin salyq jáne ózge de mindetti tólemderdi ýaqytyly ári tolyq kólemde tóleýge shaqyramyz. Bul zań talaptaryn saqtaý ǵana emes, sonymen qatar qarjylyq jáne quqyqtyq qıyndyqtardyń aldyn alýǵa sep bolady, — dedi Aqtaý qalalyq ekonomıka jáne bıýdjettik josparlaý bóliminiń bas mamany Aıanbek Myrzaǵalıev.
Aıta keteıik, atalǵan shara qala aýmaǵynda kúndelikti jalǵasady.