Aqtaýda salyǵy tólenbegen kólikter aýktsıon arqyly satylady

AQTAÝ. KAZINFORM – Aqtaýda kólik salyǵyn tólemegenderdiń temir tulparlary jappaı aıypturaqqa jabylýda. Sebebi, qala turǵyndarynyń bereshegi 586 mıllıon teńgege jetken. Osyǵan oraı, Aqtaý qalasy boıynsha memlekettik kirister basqarmasy qala ákimdigimen jáne polıtsııa basqarmasymen birge reıdke shyǵyp, salyǵy tólenbegen kólikterdi tekserdi.

- Jeke sot oryndaýshylarymen bereshegi bar tulǵalardyń banktik shottaryna buǵattaý qoıyldy. Kólik quraly aıypturaqqa qamalyp, salyǵy tólenbegen jaǵdaıda aýktsıon arqyly kólikteri satylyp, bereshekteri óndiriletin bolady, - deıdi Aqtaý qalasy boıynsha memlekettik kirister basqarmasynyń ókilderi.

Quzyrly organnyń málimetine súıensek, qazirgi tańda Aqtaýda 5900-ge jýyq turǵyn kólik salyǵyn tólemeı otyr. Olar memleketke 586 mıllıon teńge qaryz.

Buǵan deıin, Mańǵystaýda 6 ózbek azamatynyń jol-kólik apatynan qaza tapqany týraly jazǵan bolatynbyz.