Aqtaýda ruqsatsyz sherýge shyqqan munaıshylarǵa qatysty polıtsııa qoldanǵan sharalar zańǵa qaıshy emes - Bas prokýratýra
ASTANA. 6 maýsym. QazAqparat /Aıdar Ospanalıev/ - Aqtaýda ruqsatsyz sherýge shyqqan munaıshylarǵa qatysty polıtsııa qoldanǵan sharalar zańǵy qaıshy emes.
Bul týraly búgin jýrnalıstermen bolǵan brıfıngte Bas prokýratýranyń resmı ókili Jandos Ómiralıev málim etti.
Onyń sózine qaraǵanda, Aqtaý qalasynyń prokýrory zańsyz aktsııaǵa qatysýshylarǵa jergilikti atqarýshy organdardyń ruqsatynsyz mundaı sharany júzege asyrýǵa bolmaıtyndyǵyn túsindirip, sherýge qatysýshylardy sharany toqtatýǵa shaqyrdy. Alaıda sherýge qatysýshylar zańǵa moıynsunbady. Nátıjesinde polıtsııa qyzmetkerleri olardy ustap, ákimshilik jazaǵa tartýǵa májbúr boldy. «Tártip saqshylary bul rette zańda kórsetilgen talaptarǵa saı qımyldady. Osyǵan baılanysty biz de óz tarapymyzdan jaǵdaıdy retteýge baılanysty jáne qoǵamdyq tártipti qamtamasyz etýge baılanysty sharalardyń zańǵa saı bolýyn qadaǵalap otyrmyz»,-dedi resmı ókil.
Esterińizge sala keteıik, jeksenbi, maýsymnyń 5-i kúni 150-ge jýyq, negizinen «ArǵymaqTranServıs» jaýapkershiligi shekteýli seriktestiginiń ókilderi, Aqtaý qalasynyń «Yntymaq» alańynda zańsyz sherý uıymdastyryp, Qarajanbas kenishindegi baskóterýler kezinde jumystan bosatylǵan azamattardyń barlyǵyn burynǵy jumystaryna qaıtarýdy talap etken. Aqtaý qalasynyń prokýrory Talǵat Álibaev zańǵa qaıshy áreketterdiń oryn almaýy qajettigin túsindirgenimen sherýshiler prokýrordyń eskertýine qaramastan, kóshelerdegi qozǵalysty toqtatyp tastaýǵa tyrysty. Zańbuzýshylyq áreketterge tosqaýyl qoıý maqsatynda polıtsııa qyzmetkerleri sherýshilerge qatysty kúsh qoldanbaı olardy taratýǵa tyrysty. Alaıda sherýshiler qarsylyq kórsetip, tártip saqshylaryn olardy tutqyndaýǵa shara qoldanýǵa májbúr etti. Osyǵan baılanysty ishki ister organdaryna 37 azamat jetkizildi.
