Aqtaýda ruqsatsyz gúl taratqan kásipkerge aıyppul salyndy
ASTANA. KAZINFORM — Aqtaýda ruqsatsyz jarnamalyq aktsııa ótkizgen kásipker ákimshilik jaýapkershilikke tartyldy, dep habarlaıdy qalalyq ákimdiktiń baspasóz qyzmeti.
Aqtaý qalasynda Kaspıı teńizi jaǵalaýynda ár senbi saıyn turǵyndar men qala qonaqtaryna arnalǵan bı keshteri uıymdastyrylyp keledi. Atalǵan mádenı-kópshilik sharalar qoǵamdyq tártip pen qaýipsizdik talaptaryn saqtaı otyryp ótkiziledi.
Áleýmettik jelilerge júrgizilgen turaqty monıtorıng nátıjesinde 2026 jylǵy 13 maýsymda ótken is-shara barysynda kásipkerlik sýbektisiniń qala ákimdigimen kelisilmegen túrde tegin gúl taratý aktsııasyn uıymdastyrǵany anyqtaldy.
— Osy faktige baılanysty Aqtaý qalalyq ishki saıasat jáne tilderdi damytý bólimi ýchaskelik polıtsııa qyzmetkerlerimen birlesip kásipkerlik sýbektisine baryp, qoldanystaǵy zańnama talaptary boıynsha túsindirý jumystaryn júrgizdi. Nátıjesinde QR Ákimshilik quqyq buzýshylyq týraly kodeksiniń talaptaryna sáıkes tıisti ákimshilik shara qoldanylyp, 20 AEK kólemindegi aıyppul salyndy, — delingen habarlamada.
Eske salaıyq, qoǵamdyq oryndarda kez kelgen jarnamalyq, aktsııalar uıymdastyrý, sondaı-aq tegin ónimder, gúlder, kıim-keshek, azyq-túlik jáne basqa da taýarlardy taratý jumystaryn aldyn ala ýákiletti memlekettik organdarmen kelisý qajet. Belgilengen talaptardy buzý ákimshilik jaýapkershilikke ákep soǵady.
Buǵan deıin Óskemende tegin tamaq taratamyn dep dúrbeleń týǵyzǵan kásipker qamalǵanyn jazǵanbyz.
