Aqtaýda respýblıkalyq aqyndar aıtysy ótti
Aqyndar aıtysy Mańǵystaý oblysynyń 50 jyldyǵy men Aqtaý qalasynyń 60 jyldyǵyna oraı uıymdastyryldy.
Bul – óńirde sońǵy eki jyldan beri ótkizilip turǵan iri aqyndar alamany. Aıtysqa Dıdar Qamı, Rústem Aqylbekov, Muradym Mırlanov syndy aıtyskerler keldi. Sondaı-aq esimderi oblysqa tanymal jas aqyndar da jyr dodasyna qatysty.
«Mańǵystaý – qonaqjaı óńir. Al aıtysqa degen kórermenniń yqylasy tipten bólek. Oblystyq aıtystardy únemi baqylap júremiz. Bir kezde Mels Qosymbaev, Nurlan Musaevtardan keıin aqyndar shyqpaı qalǵan edi. Qazir aqyndar toby kóbeıip keledi. Bul óńirde aıtys óneri jaqsy damyp kele jatyr. Aqyndar mektebi bar», – dedi aıtysker aqyn Rústem Aqylbekov.
Alǵash bolyp saıysta mańǵystaýlyq Meıirbek Salamatov pen Ersultan Aýshanov sóz bastady. Aıtysty odan ári Erdáýlet Sardar men Azamat Orynbasarov jalǵady. Sahna tórine úshinshi jup bolyp kóterilgen Muradym Mırlanov pen Dıdar Qamı dodanyń kórkin qyzdyrdy. Júırikterdiń ónerin tamashalaǵan kórermen shabyttana qol soǵyp, erekshe qoldaý bildirdi.
Aqyndar aıtysta ólke tarıhynan bastap, aımaqtaǵy ózekti sý, jol, ekologııa máselelerin qozǵady. Jastar tárbıesi, jat aǵymnyń áseri, jumyssyzdyq, Qoshqar ata kóli men mal azyǵy tapshylyǵyn aıtyp, qart Kaspııdiń búgingi jaǵyn da tilge tıek etti. Qatysýshylardyń kezegin jáne kimmen juptasatynyn halyq anyqtady.
«Bul aıtysqa elimizdiń 7 óńirinen kelgen aqyndar qatysty. Aıtysty uıymdastyrýdaǵy negizgi maqsat – jas talanttardy jarqyratyp tanytý. Sol jas talanttardyń ashylýyna, ózin halyqtyń aldynda kórsetýge múmkindik jasaý», – dedi Mańǵystaý oblystyq mádenıet, arhıvter jáne qujattama basqarmasynyń basshysy Ábilqaıyr Baıpaqov.
Aıtysqa Mels Qosymbaev, Qoılybaı Asanov, Ahmetjan Ózbekov, Ádilet Qabylov, Nurlan Musaev tórelik etti.
Aıtysta qaraǵandylyq Dıdar Qamı 3-oryndy qanjyǵasyna baılady. Al 2-oryn Ulytaý oblysynan kelgen Maqsat Ahanovqa buıyrdy. Júldeli 1-oryndy Abaı jeriniń týmasy Rústem Qaıyrtaıuly enshilese, al batys qazaqstandyq Muradym Mırlanov aıtys jeńimpazy atandy. Bas júlde ıegerine 3 mln teńge berildi.
Saıysqa qatysýshylardyń barlyǵyna qomaqty qarjylaı syıaqy tabystaldy.
