Aqtaýda respýblıkalyq etnomedıatorlar forýmy ótti

Aqtaý qalasynda Qazaqstan halqy Assambleıasynyń 30 jyldyǵyna oraı «QHA-ǵa 30 jyl: birlik pen kelisim» atty respýblıkalyq etnomedıatorlar forýmy ótti.

Іs-sharaǵa elimizdiń 20 óńirinen 200-ge jýyq qatysýshy jınaldy.

Forýmǵa Qazaqstan halqy Assambleıasy tóraǵasynyń orynbasary Marat Ázilhanov, Mańǵystaý oblysynyń ákimi Nurdáýlet Qılybaı, Prezıdent janyndaǵy Memlekettik basqarý akademııasy rektorynyń orynbasary Álııa Masalımova, óńirlik etnomedıatsııa keńesteriniń tóraǵalary, QHA qoǵamdyq qurylymdarynyń ókilderi, memlekettik jáne quqyq qorǵaý organdarynyń qyzmetkerleri, azamattyq qoǵam ınstıtýttarynyń ókilderi, kásibı jáne qoǵamdyq medıatorlar qatysty.

Forýmnyń negizgi maqsaty – etnomedıatsııany qoǵamdyq kelisimdi nyǵaıtý, etnosaralyq jáne áleýmettik qaqtyǵystardyń aldyn alý men olardy retteýdiń tıimdi quraly retinde talqylaý. Spıkerler etnomedıatsııanyń turaqty qoǵamdyq damýǵa yqpal etetin, beıbit dıalog mádenıetin qalyptastyrýda mańyzdy qural ekenin atap ótti.

Forýmda kásibı medıatorlardy daıarlaý, vedomstvoaralyq ózara is-qımyl, quqyqtyq aǵartý jáne qoǵamda medıatıvtik mádenıetti arttyrý máselelerine erekshe nazar aýdaryldy.

Paneldik sessııa barysynda qatysýshylar óńirlerdegi tabysty tájirıbelerin bólisip, etnomedıatsııany elimizde odan ári damytýǵa qatysty ózekti máselelerdi talqylady.

Forým Qazaqstan halqy Assambleıasynyń «Eldesý jáne tatýlasý» jobasy aıasynda 28 shilde men 8 tamyz aralyǵynda ótip jatqan etnomedıatsııaǵa arnalǵan aqparattyq-aǵartýshylyq marafonnyń basty is-sharasyna aınaldy.

Marafon aıasynda elimizdiń 20 óńirinde bes myńǵa jýyq adamdy qamtyǵan 100-den astam is-shara ótýde.

Baǵdarlamada kóshpeli trenıngter, dóńgelek ústelder, podkasttar, avtorlyq arnaıy kýrstyń tusaýkeseri jáne daýlardy sottan tys retteý men etnosaralyq kelisimdi nyǵaıtýdyń tıimdi tetigi retinde etnomedıatsııany tanymal etýge baǵyttalǵan basqa da bastamalar bar.