Aqtaýda Reseıdiń bas konsýldyǵy ashylady
Taıaý ýaqytta Aqtaýda Reseıdiń bas konsýldyǵy ashylady. Bul týraly Aqordada Reseı Federatsııasynyń Prezıdenti Vladımır Pýtınmen shaǵyn quramdaǵy kelissóz barysynda Memleket basshysy Qasym-Jomart Toqaev aıtty, dep habarlaıdy kazinform.
«Forýmnyń ashylýyna taýar aınalymynyń artýyna qatysty naqty tsıfrlar keltirdik. Sońǵy 3 jylda taýar aınalymy 30 paıyzdan astamǵa artty. Osynaý oń tendentsııa jalǵasyp keledi. Osy jyldyń 8 aıynyń qorytyndysynda ózara taýar aınalymy 17 mlrd dollarǵa jetti. Bul da rekordtyq kórsetkish sanalady. Ónerkásiptik kooperatsııa qarqyndy damyp keledi. Ónerkásiptik kooperatsııa salasynda 33 mlrd dollardan astam somaǵa 143 joba júzege asyrylý satysynda. Onyń ishinde 140 joba Qazaqstan aýmaǵynda júzege asyrylyp jatyr. Reseı - Qazaqstandaǵy sheteldik kapıtal bar kásiporyndar sany boıynsha sózsiz kóshbasshy. Elimizde 20 myńnan astam reseılik kompanııa tirkelgen. Bizdiń baǵalaýymyzsha, Reseıden tikeleı ınvestıtsııa 20 mlrd dollardan asyp tústi. Al Qazaqstannyń ınvestıtsııa kólemi 6 mlrd dollarǵa jetti», - dedi Qazaqstan Prezıdenti.
Memleket basshysy Reseı gazyn Qazaqstan jeri arqyly Qytaıǵa jáne Ózbekstanǵa tasymaldaý eki eldiń energetıka salasyndaǵy ózara is-qımylyn jańa deńgeıge kótergenin atap ótti.
Sonymen qatar eki eldiń arasyndaǵy dıplomatııalyq qarym-qatynastyń keńeıip kele jatqanyna toqtaldy.
«Bıyl Reseı aýmaǵyndaǵy Qazaqstannyń ókildik jelisi Ekaterınbýrgtaǵy bas konsýldyqpen tolyqty. Qazaqstannyń bas konsýldyǵy Sankt-Peterbýrgta ashyldy, Qazanda, Astrahanda, Ombyda tabysty jumys istep tur. Taıaý ýaqytta Aqtaýda bas konsýldyq ashý josparlanǵan», - dedi Qasym-Jomart Toqaev.
