Aqtaýda «Rallı Qazaqstan - 2017» avtojarysynyń birinshi kezeńi aıaqtaldy
AQTAÝ. QazAqparat - Aqtaýda halyqaralyq avtomobıl federatsııasynyń rallı-reıd avtojarysynyń birinshi kezeńi aıaqtaldy, dep habarlaıdy «QazAqparat» HAA tilshisi.
Aqtaý qalasynyń mańynda ótkizilgen jarys avtomobıl ortalyǵynan bastalyp, qala ishindegi Shevchenko bekinisine deıin jalǵasty. Jol uzaqtyǵy 268 km. Birinshi bolyp avtoshabandoz Katar sheıhi Nasser Al-Attııa keldi. Ol «Dakar» rallı-marafonynyń eki márte, FIA-nyń Shyǵystaǵy rallı chempıonatynyń 12 márte jeńimpazy.
«Men 2009 jyly Qazaqstanda ótken «Jibek joly» avtojarysyna qatystym, ol kezde Jańaózen aımaǵynan ótkenbiz, al Aqtaýǵa alǵash kelýim», - deıdi Al-Attııa.
Jarystyń bul kezeńi Mańǵystaý oblysynyń oıly-qyrly jerlerinde ótkizilip jatqandyǵyn esterińizge salamyz.
Komandalar avtojarystyń úılestirýshisi Sergeı Talantsev uıymdastyrǵan qashyqtyǵy 2500 km jolmen júrip ótedi.
«Rallı Qazaqstan - 2017» nebary alty kezeńnen turady. Jarysqa álemniń 15 elinen 25 ekıpaj qatysýda. Olar: Qazaqstan, Saýd Arabııasy, BAÁ, Katar, Reseı, Ýkraına, Polsha, Lıtva, Germanııa, Chehııa, Belarýs, Nıderland, Slovenııa, Frantsııa.
«Bıylǵy jyly Qazaqstan alǵash ret álemniń áıgili kýbogyn ótkizý mártebesine ıe boldy. Bul tek uıymdastyrýshylar úshin ǵana emes, rallı-reıd boıynsha halyqaralyq avtomobıl federatsııasynyń kúntizbesine engen biz úshin de úlken jetistik», - dedi QR avtomotosport federatsııasynyń prezıdenti Murat Ábiqaev.
