Aqtaýda problemalar kartasy jasaldy
AQTAÝ. QazAqparat - «Eko Mańǵystaý» úkimettik emes mekemesi Soros-Qazaqstan qorynyń qoldaýymen Aqtaýdyń problemalar kartasyn jasady, dep habarlady «QazAqparat» HAA tilshisi.
Karta qysqa ýaqytta qalanyń taǵdyryna beı-jaı qaramaıtyn qalalyqtar, belsendiler, eriktiler jetkizgen habarlamalarymen tolyp qaldy. Búginde onyń sany 150-den asty, olar: abattandyrý, balalar alańy, jol, oıyn kesheni, qoqys, jaryqtandyrý sııaqty máselelerge qatysty bolyp keledi. Tizimniń basynda abattandyrý problemasy tur - 86, jol boıynsha 92 habarlama tústi.
«Aqtaý problemalar kartasy qalada qalyptasqan áleýmettik máseleler boıynsha ashyq pikirtalas júrgizý, qarapaıym halyqtyń, tájirıbesi baı túrli sala ókilderiniń ıdeıalaryn eskerý úshin daıyndaldy. Olardyń bilim áleýeti, daǵdylary bizge óte paıdaly bolýy múmkin. Árıne, onda túrli jańalyqtar da bar. Kartany tıisti aqparattarmen toltyrý máselesi týraly aıtar bolsaq, onda 250-den astam problema týraly aıtyldy. Aqtaý qalasynyń ákimdigi bul resýrsqa nazar aýdarady degen oıdamyz. Aqtaýda qoǵamdyq keńester de bar. Biraq onyń múshesi bolýǵa árkimniń múmkindigi joq. Keńes jumysynyń ózi bizde birqatar máseleler týdyrýda, al bul ınteraktıvtik ınternat-portal árqaısymyzdyń basqarý úderisine qatysýymyzǵa múmkindik beredi», - dep atap ótti «Eko Mańǵystaý» dırektory Kırıll Osın.
Portaldy ázirleýge 550 myń teńge shyǵyndaldy, shildede karta tolǵan kezde ÚEM qala ákimdigine qalalyqtar anyqtaǵan problemalarǵa jedel den qoıý úshin kartanyń múmkindikterin kórsetýge, tanystyrýǵa nıetti.
