Aqtaýda Prezıdent Teleradıokesheniniń «Hronıkadan bolashaqqa» atty kınolektorııi ótti
AQTAÝ.KAZINFORM - Mańǵystaý oblysynyń ortalyǵynda kórermenge «Tamshy» derekti fılimi usynyldy. Bul – Kaspıı teńizi men onyń biregeı endemıkalyq túri – Kaspıı ıtbalyǵyn saqtap qalý úshin óz kúshimen kúresken eriktiler erligin baıandaıtyn kartına.
«Tamshy» fılmi Prezıdent Qasym-Jomart Toqaevtyń bastamasymen BUU jarııalaǵan Halyqaralyq eriktiler jyly aıasynda túsirildi. Oblystyq máslıhattyń turaqty komıssııasynyń tóraǵasy Maqsat Rzahanov mundaı jobalardyń mańyzyn atap ótti.
Onyń aıtýynsha, derekti fılm kórermenge eldegi mańyzdy oqıǵalardy jańa kózqaraspen kórýge múmkindik beredi.
Fılmniń basty keıipkerleri, Mańǵystaý oblysynan shyqqan eriktiler Danııar Ákimjanov pen Baqytgúl Ómirhanqyzy da kórsetilimge qatysty. Aqtaý turǵyndary Teleradıokeshen kınolektorııiniń arqasynda olarmen jeke kezdesý múmkindigine ıe boldy.
Danııar Kaspıı teńiziniń jaǵasyndaǵy Baýtıno aýylynda dúnıege kelgen. Onyń balalyq shaǵy teńizben, onyń tuzdy ıisimen jáne tolqyndarynyń dybysymen baılanysty boldy.
– Kaspıı teńiziniń qazirgi jaǵdaıy alańdatarlyq. «Biz ony qalaı saqtap qala alamyz?» degen suraq meni únemi tolǵandyrady. Biz bul másele boıynsha quzyrly organdarmen jumys isteımiz. Biz tabıǵat jaratqan barlyq nársege qamqorlyq jasaýymyz kerek. Teńiz tirshiligin, qustar jáne basqa da janýarlardy qorǵaý – bizdiń ortaq maqsatymyz. Kaspıı ekojúıesin saqtaý úshin biz jaǵalaýda senbilik ótkizip, teńiz túbin qoqystardan tazartamyz. Tipti araldarda ekologııalyq naýqandar uıymdastyramyz, - deıdi erikti.
«Ekolıder» eriktiler klýbynyń jetekshisi, táýelsiz ekolog jáne erikti Baqytgúl Ómirhanqyzy jastarmen birge jaǵalaýdy tazalaýǵa, ıtbalyqtardy qorǵaýǵa jáne qorshaǵan ortany zertteýge qatysady. Onyń bastamasymen klýb músheleri Qarakól kólindegi aqqýlar men flamıngolardy baqylap, sanap, sýdyń quramyn zertteıdi.
– Men erikti bolýdy maqsat etken joqpyn. Muny júrek qalaýy dep ataýǵa bolady. Bul – meniń tabıǵatym. Qazaqstan taza bolýy kerek. Qaıda barsam da, tazalyqty nasıhattaýǵa jáne balalarǵa da sony úıretýge tyrysamyn, - deıdi Baqytgúl Ómirhanqyzy.
Belsendiler bastamasy qazir qoldaýǵa ıe boldy. Konstıtýtsııanyń ózi eriktiler qyzmetin qoldaıdy.
– Biz bul fılmdi ne úshin túsirdik? Bıyl Prezıdent Qasym-Jomart Toqaevtyń bastamasymen BUU búkil álemde eriktiler jylyn jarııalady. Dál osy turǵyda biz fılmdi Kaspıı teńizin saqtaýǵa janqııarlyqpen kómektesken adamdarǵa arnadyq. Bul naqty adamdar týraly ǵana emes, azamattyq jaýapkershilik pen adamgershilik ulttyq ıdeıanyń bir bóligine aınalyp kele jatqanynyń dáleli, - dedi QR Prezıdenti teleradıokesheniniń derekti fılmder ortalyǵynyń bas prodıýseri Ádilbek Qulaman.
Fılm ataýynyń ózi tereń maǵynaǵa ıe. Bir tamshy teńiz sýy kishkentaı ári mańyzdy emes bolyp kórinýi múmkin. Biraq myńdaǵan tamshydan teńiz quralady. Sol sııaqty eriktilerdiń árbir áreketi, bastamasy Kaspıı teńizin qorǵaýǵa baǵyttalǵan jalpy kúsh-jigerdiń bir bóligine aınalady.
«Tamshy» eshkimdi beıjaı qaldyrmady. Kórsetilimnen keıin kórermender fılmde eriktilerdiń Kaspıı teńiziniń máselesine jáne olardyń tabıǵat aldyndaǵy jaýapkershiligine degen kózqarasy shynaıy ári naqty beınelengenin atap ótti.
- Fılm maǵan úlken áser qaldyrdy. Kaspıı teńiziniń jaǵdaıy, ıtbalyqtardyń taǵdyry jáne olarǵa qamqorlyq jasaıtyn eriktilerdiń jumysy meni oılandyrdy. Keıde tipti kishkentaı árekettiń de tabıǵatty qorǵaýǵa úlken úles qosa alatynyn túsinedi ekensiń, - dedi Aqtaý turǵyny Nazjan Sársenbaı.
TRK kınolektorııi baǵdarlamasyna engizilgen ekinshi fılm Aral boldy. Bul qart balyqshy Kúntýǵan Turǵynbaevtyń ómiri Aral teńizimen jáne balyq sharýashylyǵymen tyǵyz baılanysty bolǵany týraly. Prezıdentimizdiń qoldaýynyń arqasynda Aral teńizi birtindep qalpyna kelip jatyr.
Esterińizge sala keteıik, «Hronıkadan bolashaqqa» atty aýqymdy ulttyq kınolektorıı Qazaqstan Respýblıkasy Prezıdenti Teleradıokesheniniń 30 jyldyǵyna oraı ótkizilip jatyr. 21 mamyrda Astanada bastalǵan bul iri aǵartýshylyq joba Qyzylorda, Túrkistan, Shymkent jáne Taraz qalalarynda kórsetildi.
Qazir ol Aqtaý, Atyraý, Oral jáne Aqtóbe qalalaryn qamtıtyn batys baǵytyn ashty.
Aqtaýdan keıin TRK kınolektorııi Atyraý, Oral, Aqtóbe, Óskemen, Semeı, Pavlodar, Petropavl, Qostanaı, Jezqazǵan, Qaraǵandy, Kókshetaý, Taldyqorǵan jáne Qonaev qalalarynda ótedi. Joba 25 qyrkúıekte Almatyda aıaqtalady.
Fılmge kirý tegin.
