Aqtaýda polıtsııadan qashqan júk kóliginiń júrgizýshisin jerge shege tósep toqtatty

AQTAÝ. KAZINFORM – Oqıǵa 29 shildede saǵat  túngi 1:30 shamasynda bolǵan. Mańǵystaý oblystyq polıtsııa basqarmasy baspasóz qyzmetiniń habarlaýynsha, polıtsııa qyzmetkerleri Aqtaý qalasyna qarasty Ómirzaq aýylyndaǵy óndiristik aımaqqa jaqyn avtojolda «DAV» markaly kólikti baıqap, onyń júrisi kúdik týdyrǵan.  

Alaıda, kólik júrgizýshi polıtsııanyń toqtaý týraly zańdy talabyna baǵynbaı, boı tasalaýǵa tyrysqan. Qýǵyn barysynda ol birneshe ret jol qozǵalysy erejelerin buzyp, basqa júrgizýshilerge qaýip túndirgen. Júk kóligin jerge shege tósep, toqtatýǵa týra keldi. 

Ustaý kezinde júrgizýshiniń Túrkistan oblysynyń turǵyny ekeni, júk tasymaldaýmen aınalysatyny jáne tıisti qujattary bary anyqtaldy. Alaıda ol medıtsınalyq kýálandyrýdan ótýden bas tartty.

— Azamat kelesi quqyqbuzý boıynsha jaýapkershilikke tartyldy: polıtsııa qyzmetkerleriniń zańdy talabyna baǵynbaý, manevr jasaý erejelerin buzý, qarsy baǵyttaǵy jolaqqa shyǵý, medıtsınalyq kýálandyrýdan bas tartý (mas kúıinde kólik júrgizýge teńestiriledi), jol belgileri men tańbalaryn saqtamaý, apattyq jaǵdaı jasaý. Kólik arnaıy turaqqa qoıylyp, is sotqa joldandy, — delingen habarlamada.

Buǵan deıin, Aqtaýda teńiz jaǵalaýynan ıtbalyq óleksesi tabylǵany týraly jazǵan bolatynbyz.