Aqtaýda polıtseıler sýǵa ketken kelinshekti teńizden belbeýlerin jalǵap shyǵaryp alǵan
AQTAÝ. QazAqparat - Aqtaýda polıtseıler sýǵa ketken kelinshekte teńizden jalǵaǵan belbeýlerin laqtyryp, jaǵaǵa tartyp shyǵarǵan, dep habarlaıdy QazAqparat.
10 tamyz kúni saǵat 11:30 shamasynda qalalyq ishki ister basqarmasyna «3 adam sýǵa ketti, shuǵyl kómek kerek» degen habarlama kelip túsken. Polıtsııa qyzmetkerleri birden baǵytty sol jaqqa buryp, 4 mınýt ishinde oqıǵa ornyna jetedi. Olar áıeldi kıimge taǵatyn belbeýleriniń kómegimen qutqaryp qaldy. Bul týraly QazAqparat tilshisine Aqtaý qalalyq ІІB 2 rota komandıri Erǵalı Ysqaqov aıtyp berdi.
«Kelgen boıda teńizde jantalasyp jatqan kelinshekti kórdik. Arnaıy qutqarýshy arqan bolmaǵandyqtan, kádimgi belbeýimizdi sheship, bir-birine baılap, sýǵa laqtyrdyq. Qyz belbeýdi ustady, al biz belbeýdi jalma-jan jaǵaǵa qaraı tarttyq», - deıdi Erǵalı Ysqaqov.
Komandır sol mańda teńizge túsip jatqan turǵyndar der kezinde habarlasqanyn, qutqarý kezinde qol ushyn sozǵanyn jetkizdi. Degenmen, kýágerler saqshylarǵa sýǵa túspeýin ótinip, tolqyn alyp ketý múmkin ekenin eskertken.
Jol patrýldik polıtsııa qyzmetkerleri «Suńqar - 1», «Suńqar - 4» qutqarý ekıpajdarynyń kómegimen kelinshekti 10 mınýt ishinde aman alyp qalady. Ókinishke oraı, qutqarylǵan 1987 jylǵy azamatshanyń kúıeýi sol mezette jaǵaǵa shyǵara almady. Onyń denesi búgin tańǵy saǵat 07:45-te tabyldy. Sýǵa ketken azamattardyń biri 1981 jylǵy, ekinshisi 1985 jylǵy.
Sol kúni aýa raıynyń qolaısyzdyǵynan jel týyp, úlken tolqyndar shyqqan. «Jaǵada 3 demalýshy otyrdy. Qatty soqqan jelden tolqyn kóterilip, olardy shaıyp ketti. Bir-birin qutqarǵysy kelgenimen, olardyń áreketinen nátıje shyqpady. Sóıtip ókinishke qaraı, demalýshylar ózdiginen jaǵaǵa shyǵa almaı qaldy», - delingen jedel-qutqarý otrıady taratqan málimette .
Aıgúl DÁDEN
