Aqtaýda polıtseıler órtengen úıde qalyp qoıǵan úsh balany qutqardy

AQTAÝ. QazAqparat - Aqtaýda kópqabatty úıdiń jertólesinen órt shyqty. Polıtseıler úsh búldirshindi órtten qutqardy, dep habarlaıdy QazAqparat.

Oblystyq polıtsııa departamentiniń baspasóz qyzmeti atap ótkendeı, 28 mamyr kúni túski ýaqytta 34 shaǵynaýdandaǵy úılerdiń birinen órt shyqqany jóninde shaqyrtý túsken.

Shaqyrtýǵa quramynda polıtsııa aǵa leıtenanttary Ryskeldi Madenov pen Janbolat Orynbasarov bolǵan patrýldik polıtsııa batalonynyń «Suńqar-9» jasaǵy bardy.

Polıtsııa qyzmetkerleri oqıǵa ornyna jetkende turǵyndardyń barlyǵy derlik úıden shyqqan eken. Alaıda, áıel adam tártip saqshylarynan kómek surap, dúkenge ketkende úıdiń ishinde úsh balasy qalǵanyn, olardyń eń kishisi 4-5 aılyq ekenin aıtyp, olardy alyp shyǵýyn ótingen.

Anyqtalǵandaı órt sol podezdiń jertólesinen shyqqan.

Ryskeldi balalardyń anasynan kiltti ala sala, shapshań qımyldap, dymqyl súlgini alyp balalar kilttengen páterge qaraı bet aldy.

Kishkentaı sábıdiń betine dymqyl súlgini jaýyp, basqa balalaryn úıden shyǵaryp, aman-esen anasyna tabystady.

- Kishkene búldirshinderdiń páter ishinde qalyp qoıǵanyn estigende bar oıym esh qaýip tóndirmesten solardy anasyna ákelip tabystaý boldy. Balalar shoshynyp qala ma dep ózim de tez alyp shyǵýǵa barynsha tyrystym,- deıdi polıtsııa aǵa leıtenanty Ryskeldi Madenov.

Osy rette Mańǵystaý oblysy PD ata-analardan balalardy úıde jalǵyz qaldyrmaýdy suraıdy. Oqys oqıǵalar aıaq astynan bolady. Sondyqtan ata-analardyń qaı kezde de muqııat ári saq bolǵany abzal.