Aqtaýda «Plus Capital» qarjylyq pıramıdasyna aldanǵandar sany 600 adamnan asty - prokýratýra
AQTAÝ. KAZINFORM – Aqtaýda «Plus Capital» qarjylyq pıramıdasyna aldanǵan turǵyndar áli kúnge múlki men aqshasyna qol jetkize almaı júrgenin aıtyp shaǵymdanýda.
Jańaózendik Ǵalym Talasbaev kútpegen jerden senimge engen kompanııa ókiline aldanyp, qyrýar qarjyǵa alǵan kóligin satyp, nátıjesinde aqshasyz qalǵanyn aıtady. Búginde izdeýde júrgen Artýr Temirǵalıev esimdi Qazaqstan azamaty 2019-2020 jyldary Mańǵystaý oblysynda 700-ge jýyq adamdy aldap, sazǵa otyrǵyzyp ketken.
«2019 jyly satylymda turǵan avtokóligimdi surap telefonyma bireý habarlasty. Bizge qymbattaý baǵaǵa alatynyn aıtty. Tekserip, kóz jetkizgen soń, notarıýs arqyly «Plus Capital» 2019 jyldyń 29 jeltoqsanynda «Honda Odısseı» markaly 2009 jyly shyǵarylǵan avtokóligimdi qymbat baǵaǵa alatyn boldy. Qazir izdeýde júrgen Artýr Temirǵalıev ózi qarap, 4 mln 700 myńǵa baǵalady. Sol jerde qolyma 500 myń teńge berip, qalǵan 4 mln. 200 myń teńgeni 2 aıda tóleıtinin aıtty. Alaıda qalǵan aqshany alýǵa 5-6 kún qalǵanda «Plus Capital» jabylyp, 700-ge jýyq adamnyń aqshasyn alyp ushty-kúıli joq bolyp ketti», - deıdi Jańaózen qalasynyń turǵyny Ǵalym Talasbaev.
Osydan keıin ol óziniń kóligin izdeýge kóshkenin aıtady. Ol Armenııada tirkelgen sheteldik kóligin 2019 jyldyń 30 jeltoqsanynda Dýlat Bojaev esimdi azamatqa satylǵanyn bilgen.
«Kóliktiń jańa ıesi A042112 memlekettik belgisi bar nómir alǵanyn bildim. Aqtaý qalasynda PB, oblystyq prokýratýraǵa aryzdandyq. Keıin sot aldanǵan adamdardyń paıdasyna 3 mlrd teńge óndirilsin degen úkim shyǵarǵanymen áli kúnge múlkimizge qol jetkize almaı kelemiz. Al avtokóligimdi ıelenip júrgen D.Bojaev meni ákimshilik sotqa berip kele jatyr. Ol kólikti 3,5 mln teńgege satyp alǵan. Alaıda satyp alý kezinde notarıaldy senimhatqa meniń atymnan belgisiz bireý qol qoıǵan. Keıin bul másele sotta dáleldenip, avtokólik ózimniń aryzym boıynsha 23.06.2023 jyly aıypturaǵyna qoıylǵan edi. Al avtokóligimdi ıelengen D.Bojaev bolsa ákimshilik sotqa berip, aresten sheshýin talap etip otyr. Alaıda qujat boıynsha «Honda Odısseı» kóligi meniń atymda tur. Tergeýge kelgende avtokólik buzylyp tur dep kórsetpeıdi. Alaıda ol avtokólikti júrgizip júr», - deıdi ol.
Kóliginen aıyrylǵan Ǵalym Talasbaev kóligin D.Bojaevqa satqan adamdy sotqa berý múmkin bolmaı otyrǵanyn aıtady. Kólikti qazir ıelengen adamnyń ókili birde ony qaıtys bolǵan dese, birde bilmeımin dep jaýap beretinin aıtady. Sondaı-aq, sotqa kelip qatysýdan bas tartyp kele jatqany belgili bolyp otyr.
Al Mańǵystaý oblystyq prokýratýrasy «Plus Capital»-ǵa qatysty is boıynsha birneshe adamnyń sottalǵanyn atady.
«2019 jyly qarasha aıy men 2020 jyldyń aqpan aıynyń aralyǵynda A.Temirǵalıev jáne basqalary Aqtaý qalasynda uıymdasqan qylmystyq top quramynda «Plus Capital» qarjylyq pıramıdasyn quryp, 641 jábirlenýshiniń avtokólik, páter túrindegi múlikteri men aqshalaı qarajatyn aı saıyn 30-35 paıyz syıaqy tólenetine sendirip, notarıaldy kýálandyrylǵan sharttarmen joǵary baǵaǵa qabyldap, keıinnen úshinshi tulǵalarǵa tómen baǵaǵa satyp, óz mindetterin oryndamaı jalpy somasy 3,6 mlrd teńgege materıaldyq shyǵyn keltirdi. 2023 jyldyń 20 qarashasynda qylmystyq topty uıymdastyrý A.Temirǵalıev Grýzııa Respýblıkasynda (Zýgdıdı) ustalyp, ony elge ekstradıtsııalaý máselesi qarastyrylýda. Buǵan deıin qylmystyq toptyń músheleri Qusaıyn jáne jekeshe notarıýs Kýshnırenko sot sheshimimen 12 jylǵa bas bostandyǵynan aıyryldy. Qazirgi ýaqytta Aqtaý qalalyq soty qylmystyq toptyń 7 qatysýshysyna qatysty sot protsesin júrgizip jatyr», - dedi Mańǵystaý oblystyq prokýratýrasy.
