Aqtaýda pedofıl júrgeni týraly aqparat rastalmady
AQTAÝ. QazAqparat - 4 sáýir kúni áleýmettik jelilerde pedofıldiń kóshe kezip júrgeni aıtylyp, saqtyqqa shaqyrǵan habarlamalar taraǵan edi. Bul aqparatty Mańǵystaý oblystyq ІІB joqqa shyǵardy, dep habarlaıdy Qazaqparat tilshisi.
2018 jyldyń 4-shi sáýiri kúni Aqtaý qalasyndaǵy №7 orta mektepte ótken ata-analar jınalysynda «Jasóspirimderdiń qaýipsizdigin qamtamasyz etý jáne quqyqbuzýshylyqtyń aldyn alý týraly» taqyryp talqylanǵan. Onda mektep erejesine baǵyný, oqýshylardyń sabaqqa qatysýy men qaýipsizdikti saqtaý, oqýshylarǵa avtobýstan minip túskende saq bolýlaryn, jol erejelerin saqtaýǵa jáne de bógde adamdar kezdeskende olarmen sóılespeýge, olardyń kólikterine minbeýge keńester berilgen.
Aıta keteıik, osyǵan deıin atalǵan jıynda polıtseıler 26 shaǵyn aýdanda júrgen kúdikti týraly aqparat berdi dep aıtylǵan bolatyn. Mańǵystaý oblystyq ІІB baspasóz qyzmeti bul aqparatty rastamady.
Sondaı-aq, jeli arqyly taraǵan aýdıo jazbadaǵy aqparat ta jalǵan bolyp shyqty. Onda qalada kámeletke tolmaǵan balalarǵa qatysty jynystyq áreketter jasamaq bolǵan azǵynnyń júrgeni aıtylǵan bolatyn.
Eger jalǵan aqparat taratýshy anyqtalsa, oǵan qatysty QR Qylmystyq kodeksiniń 274 baby boıynsha is qozǵalady. 5000 AEK kóleminde (12 025 000 teńge) aıyppul salynyp, bolmasa 2 jyldan 5 jylǵa deıin temir torǵa toǵytylýy múmkin.
