Aqtaýda «Patrıottyq taksı» iske qosyldy
AQTAÝ. KAZINFORM - Búginnen bastap qalada erekshe taksı qyzmet kórsete bastady. Kólik júrgizýshi turǵyndardy dittegen jerine tegin jetkizedi. Sondaı - aq rámizder, tarıhı tulǵalar týraly patrıottyq suraqtarǵa jaýap berse, syılyq beredi.
Aqtaý qalasynyń turǵyny Álııa Isaeva bul bastamaǵa kópten ázirlenip, búgin mereke kúni júzege asyrdy.
- Arnaıy Qazaqstan Respýblıkasynyń rámizderin nasıhattaý maqsatynda bastadym. Men qazaqpyn degen azamattyń boıynda patrıottyq sezimdi oıatyp qana qoımaı, ultqa, Otanǵa degen súıispenshiligin arttyrýdy kózdeımin, - deıdi ol.
Patrıottyq taksı turǵyndardyń qyzyǵýshylyǵyn oıatty. Alǵashqy jolaýshylardyń biri Qazbek Myrzaǵulov kólikti alystan baıqap toqtatqanyn aıtady.
- Ózimizdiń kók týymyzben kómkerilgen kólikke otyrǵym keldi. Mine, tegin jetkizip saldy. Elimizge qatysty, eltańbaǵa qatysty suraqtar qoıdy. Shamam kelgenshe jaýap berip, syılyq aldym. Kúshti kóńil-kúıde turmyn. Elimizde osyndaı jastardyń patrıottyq sezimin oıatatyn bastamalar kóp bolsa eken, - deıdi qala turǵyny.
Patrıottyq taksıdi bezendirýge 1 mıllıon jarym teńge qarajat jumsalǵan. Jobany Mańǵystaý oblystyq ákimdigi qoldap, qarjylandyrǵan.
Patrıottyq taksı aptasyna bir ret, keshki saǵat 17-00 den 20-00 ge deıingi aralyqta qatynaıdy. Jobanyń aıasynda qala kóshelerine memlekettik tý ilinip, qoǵamdyq avtobýstar da bezendirilgen.
