Aqtaýda «Ózenmunaıgaz» AQ dırektorynyń burynǵy orynbasary sottaldy
AQTAÝ. KAZINFORM - Aqtaý qalalyq sotynda «ÓzenMunaıGaz» AQ dırektorynyń burynǵy orynbasary Ermek Qaramyrzaevqa úkim shyǵyp, alty jylǵa bas bostandyǵynan aıyryldy.
Aqtaý qalalyq sotynyń baspasóz qyzmeti tergeýshiler kúdikke ilingen laýazym ıesine salǵyrttyq saldarynan aýyr zardaptarǵa ákelgen (QK 371-babynyń 2-bóligi) jáne zańdy kásipkerlik qyzmetke asa iri mólsherde kedergi keltirgeni (QK 365-babynyń 3-bóliginiń 2-tarmaǵy) úshin dep aıyp taqqanyn málimdedi.
Sot barysynda aıyptalýshy Ermek Qaramyrzaevtyń «Ózenmunaıgaz» AQ dırektorynyń munaı jáne gaz óndirý jónindegi orynbasary qyzmetip atqaryp, sonymen qatar kompanııanyń konkýrstyq komıssııasynyń tóraǵasy bola tura, burǵylaý jumystaryna tender ótkizý kezinde belgili bir kompanııanyń múddesin qorǵaý arqyly basqa kompanııaǵa zııan keltirgeni anyqtaldy.
«Sottalýshy Ermek Qaramyrzaev «K» JShS jeńimpaz dep tanylǵan 2023 jylǵy 20 naýryzdaǵy tender qorytyndylary týraly hattamanyń kúshin joımaı, byltyr 29 naýryzda dál sol lottar boıynsha tender ótkizý týraly zańsyz sheshim qabyldaǵan. E.Qaramyrzaev óz áreketiniń zańsyzdyǵyn túsinip, «A» JShS-niń ótinishi áleýetti ónim berýshilerdiń talaptaryna sáıkes kelmeıtinin bile tura, óz ókilettikterin «A» JShS-niń múddelerin qoldaý maqsatynda paıdalanyp, 29 naýryzda qaıtalama jınalys ótkizip, nátıjesi boıynsha barlyq 4 lot «A» JShS aýktsıondaryna jiberý týraly sheshim qabyldaǵan. Konkýrs qorytyndysy boıynsha baǵany barynsha tómendetken «A» JShS jeńimpaz dep tanylyp, qyzmetterdiń jalpy quny 2,7 mlrd teńgeden astam somaǵa tómendetilgen», - dep jazylǵan qalalyq sot taratqan habarlamada.
Sonymen qatar kompanııa dırektorynyń orynbasary bolǵan Ermek Qaramyrzaev «Ózenmunaıgaz» AQ men «Aqtaý munaı servıstik kompanııasy» JShS arasynda jasalǵan sorǵy jáne kompressorlyq qubyrlardy jalǵa berý týraly shart talaptarynyń oryndalýyn teksermeı, oryndalǵan jumystar týraly aktilerge qol qoıyp, 21 749 456 mln.teńge somasyndaǵy jaldaý aqysyn tóleýden ustaý sharalaryn qoldanbaı salǵyrttyq tanytqany belgili bolyp otyr.
Onyń kinási jábirlenýshiniń, kýálardyń aıǵaqtarymen basqa da is materıaldarymen dáleldengen. Bul rette prokýror Ermek Qaramyrzaevty jasaǵan qylmystary úshin kináli dep tanyp, jeti jylǵa bas bostandyǵynan aıyrýdy surady. Al sottalýshy kinásin moıyndaýdan bas tartyp, ózin aqtaýdy surady.
«Sot úkimimen aıyptalýshy Ermek Qaramyrzaev QK-tiń 371- babynyń 2-bóligi, 365-babynyń 3-bóligi 2-tarmaǵy, 58-babynyń 3-bóligimen kináli dep tanylyp, ony ómir boıy munaı-gaz salasyndaǵy kommertsııalyq uıymdarda basshylyq laýazymdardy atqarý quqyǵynan aıyryp, 6 jyl merzimge bas bostandyǵynan aıyrý jazasy taǵaıyndaldy», - dedi Aqtaý qalalyq sotynyń baspasóz qyzmetindegiler.
Sot úkimi shyqqanymen ázirge zańdy túrde kúshine engen joq.
