Aqtaýda Ózbekstannyń konsýldyǵy ashylmaq

Aıta ketsek, buǵan deıin bir top májilis depýtattary Ózbekstan men basqa elderden keletin eńbek mıgranttarynyń máselelerin sheshýdi suraǵan bolatyn. Osy máselege baılanysty olar birneshe quzyrly vedomstvoǵa hat joldaǵan. Depýtattardyń aıtýynsha, 2014 jyly eńbek mıgranttaryna úı sharýashylyǵynda jumys isteýge ruqsat berilgen. Bul zańsyz eńbek mıgranttaryn azaıtýǵa kómekteskenimen, quqyq buzǵan sheteldikter men azamattyǵy joq adamdardy elimizden májbúrlep shyǵarýdy retteýde kemshilikter bar.

«Ásirese Atyraý men Mańǵystaýda bul másele ózekti bolyp tur. Elimizge Ózbekstannan keletin mıgranttardyń kóp ekenin aıta ketý kerek. Qujatyn joǵaltqan sheteldikter óz eline birden qaıta almaıdy. Ol úshin Nur-Sultanǵa kelip, ózderiniń elshiligine ótinish bildirip, tólqujat alýy nemese óz eline oralý úshin sertıfıkat rásimdeýi tıis. Alaıda jeke basyn kýálandyratyn qujattary bolmaǵandyqtan, olarǵa jol júrý qujaty berilmeıdi. Sol sebepten, olardy eline qaıtarý múmkin bolmaı otyr. Sonyń saldarynan osy sanattaǵy sheteldikter tarapynan jasalǵan quqyq buzýshylyqtar sany da kóbeıýde», - dedi depýtattar.

Bul depýtattyq saýalǵa Іshki ister mınıstri Erlan Turǵymbaev jaýap berdi.

Onyń jaýabyna sáıkes, ІІM budan buryn SІM arqyly qaıtyp oralýǵa arnalǵan kýálikti resimdeýmen baılanysty máselelerdi sheshý úshin Ózbekstan Elshiliginen edáýir qashyq óńir retinde Mańǵystaý oblysynda Ózbekstan Respýblıkasynyń ókildigin ashýdy usynǵan.

«Osyǵan baılanysty Qazaqstan Respýblıkasy Premer-Mınıstriniń tapsyrmasy aıasynda Aqtaý qalasynda Ózbekstannyń konsýldyq bólimin ashý týraly sheshim qabyldandy. Konsýldyq osy jyly ashylmaq», - deıdi jaýabynda Іshki ister mınıstri.

Erlan Turǵymbaevtyń habarlaýynsha, jeke basyn kýálandyratyn qujattarsyz turatyn sheteldikterdiń quqyqtyq mártebesin retteý bóligine qatysty máselelerde 2012 jylǵy QR men ÓR Úkimetteri arasyndaǵy readmıssııa týraly kelisim normalary qoldanylady.