Aqtaýda Ózbekstannyń bas konsýldyǵy ashyldy
Dıplomatııalyq keńse Qazaqstan men Ózbekstan arasyndaǵy ekonomıkalyq baılanys pen dostyq qarym-qatynastyń arta túsýine múmkindik bermek.
Saltanatty sharaǵa Mańǵystaý oblysynyń ákimi Serikbaı Trumov pen Ózbekstannyń QR Tótenshe jáne ókiletti elshisi Saıdıkram Nııazhodjaev qatysty.
«Búgin qasıetti Mańǵystaý óńirinde tarıhı sáttiń kýási bolyp otyrmyz. Josparly túrde eki halyq arasyndaǵy ejelgi, tereń tarıhy bar mádenı jáne rýhanı baılanysymyz odan ári keńeıip keledi. Eki el arasyndaǵy dostyq qarym-qatynasymyz odan ári nyǵaıa bergeı»,- dep quttyqtady Mańǵystaý oblysynyń ákimi Serikbaı Trumov.
«Bas konsýldyqtyń ashylýy memleketaralyq baılanystyń artýyna jol ashatyn boldy. Eki el arasyndaǵy alys-beris pen barys-kelis arta túserine senimdimin. Bıyldyń ózinde 6 aıda Qazaqstan men Ózbekstan arasyndaǵy taýaraınalym 1 mıllıard 800 mıllıondy qurady. Jyldyń sońyna deıin 4 mıllıard Aqsh dollaryna jetedi dep kútilýde», - dedi Ózbekstannyń elshisi Saıdıkram Nııazhodjaev.
Aıta keteıik, aǵymdaǵy jyldyń 17 shildesi kúni eki eldiń Úkimet basshylarynyń qatysýymen «Beıneý-Aqjigit-Ózbekstan» respýblıkalyq mańyzy bar avtojoly saltanatty túrde ashyldy. Bas konsýldyqta eki el azamattary men eńbek mıgranttaryna da quqyqtyq kómek kórsetiledi.
Sondaı-aq, Aqtaýda Ázerbaıjan, Iran, Túrkııa men Túrkimenstannyń konsýldyqtary jumys istep tur.