Aqtaýda ózbekstandyq áskerı súńgýirler daıyndyqtan ótti
ASTANA. KAZINFORM – Qazaqstan Qarýly kúshteri Áskerı-teńiz kúshteriniń súńgýirlik oqý-jattyǵý kesheni bazasynda súńgýirlik daıarlyq boıynsha, onyń ishinde Ózbekstan áskerı qyzmetshileri úshin oqý-jattyǵý jıyndary ótti.

Qorǵanys mınıstrliginiń málimetinshe bir apta ishinde áskerı-teńiz bazasynyń tájirıbeli nusqaýshylarynyń jetekshiligimen teorııalyq jáne praktıkalyq kýrstardy qamtıtyn qarqyndy daıyndyq júrgizildi.
— Barlyq qatysýshylar keshendi daıyndyqtan ótip, óz daǵdylaryn baǵalady jáne odan ári oqytý boıynsha usynymdar aldy, -dep túsindirdi súńgýir jáne izdestirý-qutqarý qyzmetiniń bastyǵy kapıtan-leıtenant Dáýren Mergenbaev.
Jıyn qorytyndysy boıynsha oqýdan ótken súńgýirlerge sertıfıkattar tabystaldy.
Aıta ketelik búgin Prezıdent Qasym-Jomart Toqaev «Aýmaqtyq qorǵanys týraly» zańǵa jáne oǵan ilespe túzetýlerge qol qoıǵan edi.