Aqtaýda oıyn alańynda balany urǵan áıel qamaýǵa alynýy múmkin

AQTAÝ. QazAqparat – Oqıǵa Aqtaýdaǵy 17 shaǵynaýdanda №54 úıdiń mańyndaǵy fýtbol alańynda bolǵan, dep habarlaıdy QazAqparat lada.kz saıtyna silteme jasap.

Vıdeo avtorynyń aıtýynsha, balalar fýtbol oınap júrgen. Bir kezde balalardyń biri tepken dop ekinshi balaǵa tıgen.

«Dop tıgen balanyń ájesi nemeresin qorǵap, renjitken balany ura bastaǵan. Zardap shekken balanyń anasy bul ýaqytta qalada bolmaǵan, al ákesi jumysta bolǵan», - deıdi kýáger.

Polıtsııa departamentinen habarlaǵandaı, tártip saqshylary atalǵan mekenjaı boıynsha tekserý júrgizgen jáne fakti rastalǵan. Oqıǵa 14 shildede bolǵan. 15 shilde kúni keshkisin taıaq jegen balanyń ata-anasy oblystyq balalar aýrýhanasyna júgingen.

«64 jastaǵy áıelge QR Ákimshilik kodeksiniń 73-1 baby (Densaýlyqqa qasaqana jeńil jaraqat keltirý) boıynsha hattama toltyrylyp, sheshim qabyldaý úshin ákimshilik sotqa jiberiledi», - dep málimdedi vedomstvodan.

Aıyptalýshy 15 AEK kóleminde aıyppul tóleıdi nemese 15 táýlikke deıin ákimshilik qamaýǵa alynady.