Aqtaýda ótken el birinshiliginde shymkenttik shahmatshylar 1-oryndy jeńip aldy

AQTAÝ. QazAqparat - Aqtaýda shahmattan erler men áıelder arasynda QR chempıonatynyń jartylaı fınaly aıaqtaldy. Jeti kúnge sozylǵan jarysqa Qazaqstannyń túkpir-túkpirinen 67 er, 26 áıel shahmatshy qatysty, dep habarlaıdy QazAqparat.

QR Shahmat federatsııasy jáne «Debıýt» shahmat mektebiniń bastaýymen ótken jarys Aqtaýda úshinshi jyl qatarynan uıymdastyrylyp otyr.

- Chempıonattyń qatysýshylary 9 týr oınady. Ár týrda oıynshylarǵa oılaný úshin 90 mınýt berildi jáne ár júristen keıin taǵy 30 sekýnd qosylyp otyrdy. Orta eseppen ár oıyn 4 saǵatqa sozyldy, - dedi «Debıýt» shahmat mektebiniń dırektory Anvar Shaıhymov.

QR chempıonatynyń jartylaı fınal qorytyndysy boıynsha erler arasynda Shymkent qalasynyń shahmatshysy, FIDE sheberi Ábilqaıyr Ábilmansur 1-oryn alsa, 2-oryndy Pavlodar qalasynyń sportshysy, shahmattan halyqaralyq sport sheberi Konstantın Kazakov, al qola júldeni Aqtóbe qalasynyń sportshysy, shahmattan halyqaralyq sport sheberi Arystanbek Urazaev enshiledi.

Al, Mańǵystaý oblysynan qatysqan 12 jasar Edgar Mamedov 7 jáne 11 oryn aralyǵyndaǵy erekshe nátıje kórsetti.

Áıelder arasynda 1-oryndy Shymkent qalasynyń shahmatshysy Sultanbek Zeınep, 2-oryndy Almaty oblysynan kelgen Qalıahmet Elnaz alsa, 3-oryn Qaraǵandy qalasynyń sportshysy Papandopýlo Krıstınaǵa buıyrdy.

«Debıýt» shahmat mektebiniń dırektory Anvar Shaıhymovtyń aıtýynsha júldeli oryndarǵa ıe bolǵan alty shahmatshy qazan aıynda Aqtaý qalasynda ótetin sýperfınalǵa joldama utyp aldy.

- Mańǵystaý oblysy shahmattan el birinshiliginiń jartylaı fınalyn úshinshi ret qabyldap jatyr. QR chempıonatynyń fınalyn ótkizý quqyǵy da bizge buıyryp otyr. Fınalda básekelestik joǵary deńgeıde bolady. Sebebi elimizdiń eń myqty degen shahmat sheberleri keledi, - dedi Anvar Shaıhymov.