Aqtaýda órtengen úıden er adamnyń denesi tabyldy
AQTAÝ. QazAqparat - Órtengen úıden er adamnyń denesi tabyldy. Onyń kim ekeni anyqtalyp jatyr, dep habarlaıdy QazAqparat tilshisi.
Aqtaýda 3 bólmeli úı túgeldeı janyp ketken. Órtti sóndirgen soń qalǵan kúldiń arasynan er adamnyń denesi tabylǵan. Órttiń neden tutanǵany ázirge belgisiz.
Jalpy, Mańǵystaýda jyl basynan beri 31 órt oqıǵasy tirkelgen. Bul týraly oblystyq tótenshe jaǵdaılar departamentiniń mamandary málimdedi. Olardyń aıtýynsha, kóp jaǵdaıda órttiń tutanýyna qaýipsizdik erejelerin saqtamaý, tok kózderin durys paıdalanbaý, balalardy qaraýsyz qaldyrý sekildi jaǵdaılar sebep bolady.
Sondaı-aq, byltyr qalada 1245 órt qaýipsizdigin buzý faktisi anyqtalyp, shara qoldanylǵan. Órt jaǵdaılarynyń aldyn alý úshin mamandar túsindirý sharalaryn kúsheıtken.
«Jyl boıy 101-ge 1430 dabyl túsip, 43 adam jalynnan arashalandy. 1000-nan astam adam qaýipsiz jerge shyǵaryldy. Órttiń basym bóligi turǵyn úılerde (121 jaǵdaı) jáne avtokólikte (117 oqıǵa) bolady»,-deıdi Órt qaýipsizdigi salasyndaǵy baqylaý jáne profılaktıkalyq qyzmet basqarma bastyǵynyń orynbasary Aleksandr Alekseev.
