Aqtaýda Ortalyq Azııa elderi men Reseı ushaqtary jóndeledi

ASTANA. KAZINFORM – Aqtaý áýejaıy aýmaǵynda ushaqtarǵa tehnıkalyq qyzmet kórsetý ortalyǵy salynady. Bul týraly Parlament Májilisinde kólik-logıstıkalyq áleýetti damytý taqyrybyna arnalǵan Úkimet saǵatynda Kólik mınıstri Marat Qarabaev málim etti.

- Qazirgi kezde perspektıvalyq mýltımodaldy áýe habtardyń biri – Aqtaý áýejaıy. Onyń negizgi artyqshylyǵy - barlyq kólik túrine qoljetimdiligi jáne Eýropaǵa 3 saǵattyq jaqyn jerde ornalasýy. Júk áýehabymen qatar, YDA, Turkish Technic jáne ASFAT kompanııalary birlesip, áýejaı aýmaǵynda ushaqtarǵa tehnıkalyq qyzmet kórsetý jáne oqý ortalyqtaryn salýdy josparlap otyr, - dedi M.Qarabaev.

Osy oraıda mınıstr qyzmet kórsetý ortalyǵy Qazaqstan, Reseı jáne Ortalyq Azııa elderiniń azamattyq jáne áskerı ushaqtaryn qamtıtynyn aıtty.

- Osy sharalardy júzege asyrý nátıjesinde áýejaıdyń júk tasymaldaý qýaty jylyna 200 myń tonnaǵa deıin, al áýejaıdyń jyldyq aınalymy 520 mıllıard teńgege deıin artady dep josparlanǵan, - dedi vedomstvo basshysy.

Budan buryn habarlanǵandaı, Qazaqstannyń áýe keńistigi arqyly tasymaldanatyn júk kólemi artady.