Aqtaýda órt qaýipsizdigin saqtamaǵandarǵa 900 myń teńgege jýyq aıyppul salyndy

AQTAÝ. QazAqparat – Aqtaýda jaz bastalǵaly órt qaýipsizdigin saqtamaǵan 7 adamǵa 897 000 teńge aıyppul salynǵan. Onyń ishinde 1 zańdy tulǵaǵa 690 000 teńge jáne 6 jeke tulǵa 207 000 teńge aıyppul arqalaǵan. Bul týraly Mańǵystaý oblystyq Tótenshe jaǵdaılar departamentiniń baspasóz qyzmetinen málim etti, dep habarlaıdy QazAqparat tilshisi.

Jyl basynan beri Aqtaý qalasyndaǵy qoqys konteınerlerin, mekemeler men qurylys nysandary aýmaǵynda qoqys qaldyqtaryn órteý derekteri kóp tirkelgen. Sondaı-aq, órt sóndirý tehnıkalarynyń kómegine júginý jıilep ketken.

«Bıylǵy jaz maýsymy bastalǵaly mamandar QR «Ákimshilik quqyq buzýshylyqtar týraly» kodeksiniń 336-baby negizinde 7 adamǵa 897 000 tg aıyppul, onyń ishinde 1 zańdy tulǵaǵa 690 000 tg jáne 6 jeke tulǵa atyna 207 000 tg aıyppul salǵan. Maýsymda dala alqaptarynda órt shyǵý derekteri jıilep ketti. Munyń sebebi – negizinen azamattardyń jaz aılarynda qaýipti elemeı, nemquraılyq tanytýy», - delingen baspasóz málimetinde.