Aqtaýda ornynan qozǵalǵan ushaq on mınýttan keıin jerge qaıta qondy
ASTANA. QazAqparat - 26 aqpan kúni Aqtaý-Məskeý baǵytynda ushatyn reseılik «Aeroflot» əýe kompanııasynyń US-1955 reıstegi ushaǵy usha sala qaıtadan Aqtaýdyń halyqaralyq əýejaıyna qonýǵa məjbúr boldy, dep habarlaıdy QazAqparat.
Bul týraly osy reıspen ushpaq bolǵan jolaýshylar aıtyp berdi.
Ushaq tańǵy saǵat 05.30 ushýy kerek edi. Alaıda, aspanǵa kóterilgen əýe kemesi 10-15 mınýttan keıin qaıtadan əýejaıǵa qonǵan. Jolaýshylardyń aıtýynsha reıs 27 aqpan, túngi maǵat 01.00-ge shegerilgen.
«Tań atpaı tirkelip, borttaǵy oryndarymyzǵa jaıǵastyq. Ushqannan keıin 10-15 mınýttan keıin ushaqtyń oń jaǵyndaǵy qozǵaltqyshtan bir shý estildi. Ushaqtyń búkil qozǵaltqyshtary isten shyqqandaı boldy. Bort komandıri tehnıkalyq sebepterge baılanysty Aqtaýǵa qaıta qonatynymyzdy aıtty. Qonǵan kezde, ushaqtyń ishinde kerosınniń ıisi sezildi», - degen jolaýshylardyń biri jergilikti Lada basylymyna bergen suhbatynda.
«Aeroflot» kompanııasynyń ókili Əsem Qonysbaıdyń aıtýynsha, reıs keıine shegerilgendikten jolaýshylardy qalaǵa alyp shyǵatyn kólik daıyndalyp, keıbir adamdar qonaq úıge jaıǵastyrylǵan.
«Əýe kemesi tehnıkalyq sebepterge baılanysty qaıta qondy. Ushaqtaǵy olqylyqtyń sebebin əli naqty bilmeımiz. Tehnıkalyq aqaýdy anyqtap, jóndeý úshin Məskeýden maman kelýi kerek. Al, adamdar dəl osy ushaqpen usha ma, əlde basqa ushaq berile me, ol da belgisiz», - dedi Əsem Qonysbaı.
