Aqtaýda óńirdegi eń úlken sport saraıy salyndy
AQTAÝ. QazAqparat - Aqtaýda Mańǵystaý oblysyndaǵy eń iri sport nysanynyń - «Mańǵystaý Arena» sport saraıynyń qurylysy aıaqtaldy.
Ǵımarattyń aýmaǵy - 10 myń 300 sharshy metrdi quraıdy. Sport saraıy 2,5 gektar aýmaqta ornalasyp, 20-dan astam sport túrimen aınalysýǵa múmkindik beredi, dep habarlaıdy «QazAqparat» HAA tilshisi.
Nysan Qashaǵan jobasynyń operator-kompanııasy bólgen 3 mlrd 300 mln teńgege salyndy. Onyń qurylysyna bıýdjetten qarjy bólinbegen. Ǵımarat paıdalanýǵa berýge tolyqtaı daıyn, nysannyń resmı túrde saltanatty ashylýy jýyq arada ótkiziledi.
«Sport saraıynda 5 zal bar, onyń eń úlkeniniń aýmaǵy 14 myń sharshy metrdi quraıdy. Ol jeńil atletıkaǵa arnalǵan. Júgirý jolaǵy, granata laqtyrý aýmaǵy bar. Túrli deńgeıdegi chempıonattardy ótkizýge arnalǵan úlken zal bar. Bul jerde 540 kórermenge arnalǵan oryndyq qoıyldy. Bir ýaqytta eki alań ornatyp, jattyǵý jasaı berýge múmkindik bar. Shaǵyn fýtbol, basketbol, voleıbol, úlken tennıs oınaýǵa bolady. Jekpe-jekke arnalǵan ortasha zalymyz da, kishi zalymyz da bar. Karate, boks, grek-rım kúresi, taekvondo, dzıýdo, qazaqsha kúres jarystaryn ótkizýge múmkindik beredi. Sonymen qatar, sport saraıynda fıtneske arnalǵan arnaıy jattyǵý zaly, aýyr atletıkamen aınalysýǵa múmkindik beretin trenajer zaly salynǵan. Ár zaldyń óziniń áıelder men erlerge arnalǵan jýyný bólmesi, bapkerler kabıneti bar», - dedi «Mańǵystaý Arena» QMM basshysy Zeınýlla Ońaıbaev.
Sonymen qatar, sport kesheninde hamam monshasy men saýnasy bar shaǵyn basseın, ekinshi qabatta ashana, sport dúkeni qarastyrylǵan. Bul jerde bir mezgilde 200 sportshy, al kúnine 1 500 adam jattyǵa alady.
Aqtaýda bul sport saraıynyń qurylysy 2014 jyly bastalǵan. Tapsyrys berýshi - «Mańǵystaý Qurylys Invest», al merdiger - «Nýrsat» JShS.
