Aqtaýda oqýshylar synyptasyn skotchpen baılap, basyna jumyrtqa laqtyrǵan
AQTAÝ. QazAqparat - Aqtaýda №8 mekteptiń oqýshylary synyptasyn skotchpen tireýishke baılap, basyna jumyrtqa laqtyrǵan, dep habarlaıdy QazAqparat tilshisi.
Olar óz áreketin vıdeoǵa túsirip, áleýmettik jelige jarııalaǵan. Osy oqıǵaǵa qatysty jeli paıdalanýshylary arasynda daý týǵan bolatyn. Áleýmettik jelide taraǵan beınetaspada oqýshylar synyptasyn skotchpen baılap qoıyp, jumyrtqa laqtyryp, balany jylatady. Degenmen, osy jaǵdaıǵa qatysty oqýshynyń ata-anasy esh jerge shaǵymdanbaǵan.
«Ata-anamen jáne oqýshylarmen jumys júrgizildi. Beınetaspada boı kórsetken barlyq oqýshymen sóılestik. Balanyń ata-anasy shaǵym jazbady. Oqýshylardyń barlyǵy - tártipti jáne úlgerimi jaqsy balalar. Anyqtalǵandaı, olar bul áreketin oınap jasaǵan», - deıdi Mańǵystaý oblystyq bilim basqarmasy basshysynyń orynbasary Aıjaqsy Turjanova.
Oblystyq ІІD baspasóz qyzmeti osyǵan baılanysty Aqtaý qalasy mektep oqýshylarynyń ata-analaryna qatysty mektep ınspektorymen birge is-sharalar qolǵa alynǵanyn málimdedi.
«Bul jaǵdaı boıynsha jınalǵan qujattar Aqtaý qalasy ákimdiginiń janyndaǵy kámeletke tolmaǵandar isteri jónindegi komıssııaǵa joldanady» delingen habarlamada.
