Aqtaýda oqýshylardyń jartysynan kóbi sabaqqa kelmeı qaldy
AQTAÝ. KAZINFORM — Aqtaýda mektepterge shabýyl jasalýy múmkin degen habarlamadan keıin, oqýshylardyń jartysynan kóbi mektepke barmaı qalǵan. Ata-analar saqtyq úshin, balalaryn úıde qaldyrýdy jón kórgen.
Mańǵystaý oblystyq bilim basqarmasynyń málimetinshe, barlyq mektepte kúzet bar, beınebaqylaý kameralary men dabyl túımeleri jumys istep tur. Jaǵdaı baqylaýda.
— 2025 jylǵy 9 qarasha kúni messendjerler men áleýmettik jelilerde Aqtaý qalasy turǵyndarynyń arasynda alańdaýshylyq týdyrǵan jalǵan aqparat taraldy. Atalǵan jaǵdaı boıynsha quqyq qorǵaý organdary shuǵyl áreket etip, arnaıy jedel-tergeý shtaby qurylyp, barlyq qajetti tekserý sharalary júrgizildi. Nátıjesinde eshqandaı qaýip joq ekeni anyqtaldy. Qazirgi ýaqytta barlyq bilim berý uıymdary qalypty (shtattyq) rejımde jumys istep jatyr. 10 qarasha kúni Aqtaý qalasyndaǵy mektepterde 1 jáne 2-aýysym sabaqtaryna 30 502 oqýshy qatysty. Bul jalpy oqýshylar sanynyń 43,1% quraıdy, — delingen habarlamada.
Buǵan deıin, «Aqtaý mektepterinde jappaı qantógis bolady» degen jelidegi jazba tekserilip jatqanyn jazǵan bolatynbyz.