Aqtaýda Nazarbaev mektebiniń oqýshylary muǵalimdi ishimdik ishti dep aıyptady
AQTAÝ. KAZINFORM — Aqtaýdaǵy Nazarbaev Zııatkerlik mektebiniń qyzmetkerine qatysty ishki tekserý bastaldy. Buǵan áleýmettik jelide taraǵan beınejazba sebep bolǵan.
Vıdeoda oqýshylar mektep qyzmetkerinen oqý ornyna alkogol iship kelgeni týraly suraıdy. Al, er adam ishimdik qoldanǵanyn joqqa shyǵarmaı, oqýshylardan keshirim suraıdy.
Oqýshylardyń aıtýynsha, mundaı jaǵdaı buǵan deıin de bolǵan. Sondaı-aq olar qyzmetkerdiń balalarmen dóreki sóıleskenin alǵa tartqan. Alaıda bul málimetter ázirge resmı túrde rastalǵan joq.
Mektep dırektory Rınat Jumabaevtyń aıtýynsha, qazir ishki tergeý júrgizilip jatyr.
— Áleýmettik jelide taraǵan aqparatqa baılanysty mektepte ishki tergeý júrip jatyr. Keltirilgen derekter tekserilýde. Tekserý nátıjesinde qyzmetker tarapynan zańbuzýshylyq anyqtalsa, Eńbek kodeksine sáıkes shara qoldanylady. Tipti, jumystan shyǵarylýy múmkin, — deıdi ol.
Oqıǵaǵa qatysty Mańǵystaý oblysynyń bilim salasynda sapany qamtamasyz etý departamenti de aqparat jınaı bastaǵan. Oqý-aǵartý mınıstrliginiń málimetinshe, Nazarbaev Zııatkerlik mektepteri avtonomdy bilim berý uıymy bolǵandyqtan, oqý protsesi men ishki baqylaýdy derbes júzege asyrady.
Vedomstvo jaǵdaı rastalǵan jaǵdaıda qyzmetkerdiń áreketimen qatar, mekteptegi ishki baqylaý men oqýshylardyń qaýipsizdigine jaýapty tulǵalardyń jumysyna da baǵa berilýi múmkin ekenin habarlady. Qorytyndy tek tekserý aıaqtalǵannan keıin jasalady.
Buǵan deıin Aqtaýda balyqtan ýlanyp, aýrýhanaǵa túsken 9 jastaǵy balanyń týystary kómek suraǵanyn jazǵanbyz.
