Aqtaýda Naýryz toılaýǵa 20 myńnan asa adam jınaldy

AQTAÝ. QazAqparat - Aqtaýda Naýryz meıramyn toılaýǵa teńiz jaǵalaýyna 20 myńnan astam adam jınaldy, dep habarlaıdy QazAqparat tilshisi.

Amfıteatr alańyna 20 myńnan astam adam jınaldy.

Qala turǵyndary men qonaqtary úshin kıiz úıler tigilip, naýryz kóje men ulttyq taǵamdar ázirlendi.

Dástúr boıynsha kórermender qoıylymdardy tamashalady. Túrli ulttardyń qolóner buıymdarynan kórme uıymdastyryldy.

Án shyrqalyp, ulttyq sport oıyndarynan jarystar ótkizildi.

Óńir basshysy Nurlan Noǵaev jınalǵandardy merekemen quttyqtap, eldiń jetistigi – halyqtyń birligi men yntymaǵy ekenin atap ótti.

«Qurmetti mańǵystaýlyqtar, elimizdiń búgingi jetken jetistikteri, saıası turaqtylyq, qoǵamdaǵy kelisim – bizdiń eńbegimizdiń jemisi. Barshańyzdy Naýryz merekesimen shyn júrekten quttyqtaımyn!» – dedi Mańǵystaý oblysynyń ákimi Nurlan Noǵaev.

Aıta keteıik, Naýryz merekesi qarsańynda Mańǵystaý oblysynda 250-den astam is-shara uıymdastyryldy.