Aqtaýda naýqas aýrýhananyń ekinshi qabatynan qulap ketti

AQTAÝ. QazAqparat – Aqtaýda aýrýhananyń ekinshi qabatynan 54 jastaǵy patsıent qulap ketti, dep habarlaıdy QazAqparat tilshisi.

Oblystyq kópbeıindi aýrýhananyń 2-qabatynan qulaǵan 54 jastaǵy beıneýlik 6 naýryz kúni travmotologııa bólimine túsken.

Dárigerler teksergen kezde sol jaq shyntaǵynyń shyqqanyn anyqtap, salyp beredi.

Al josparly ota búginge, ıaǵnı 10 naýryzǵa qoıylǵan. Alaıda naýqas tańerteńgi 07:15-te travmotologııa bóliminiń terezesin syndyryp, 2-qabattan qulap túsedi.

Naýqastyń oń jambas súıegi synyp, qazir reanımatsııada jatyr. Jaǵdaıy - turaqty aýyr.

Al erteń sol shyntaǵy men oń jambasyna operatsııa jasalady dep josparlanǵan.

«Esin biledi, suraqtarǵa jaýap beredi. Biraq naýqas qulaýynyń sebebin aıtpaıdy. Qazir jalpy jansaqtaý bóliminde jatyr. Ol 3-4 metr bıiktikten qulaǵan. Kezekshi travmotolog, reanımatolog, qosymsha dárigerler der kezinde kómek kórsetken», - deıdi Mańǵystaý oblystyq kópbeıindi aýrýhanasynyń travmotologııa bóliminiń meńgerýshisi Eset Shahatbaev.