Aqtaýda múgedekterdi qaıyr suraýǵa májbúrlegen otbasy músheleri sottaldy
AQTAÝ. KAZINFORM – Mańǵystaý oblystyq prokýratýrasynyń habarlaýynsha, Aqtaýda qaıyr suraýmen baılanysty «otbasylyq bıznes» anyqtalǵan. Osy derekke qatysty Aqtaý qalalyq sotynyń úkimimen Qylmystyq kodekstiń 126 (bas bostandyǵynan zańsyz aıyrý) jáne 128 (adamdy qanaý) baptary boıynsha aýyr qylmys jasaǵany úshin úsh adam sottaldy.
Sottalǵandar – 50 jastaǵy áıel men onyń eki uly. Olar 2023 jyldyń qazanynan 2024 jyldyń naýryzyna deıingi kezeńde Aqtaý qalasynda múgedektigi bar eki adamdy kúshtep ustap, olardy paıda tabý maqsatynda paıdalanyp, qoǵamdyq oryndarda qaıyr suraýǵa májbúrlegen.
– Olar aıaǵy joq eki jábirlenýshini Qaraǵandy qalasynan aldap, áýeli Semeı qalasynda qaıyr suraýǵa májbúrlegen, keıin Aqtaý qalasyna ákelip, jergilikti bazarlarǵa shyǵarǵan. Al tapqan aqshalaryn sottalǵandar ózderine alyp otyrǵan, - delingen habarlamada.
Osy ýaqyt boıy jábirlenýshilerdiń, qashýǵa árekettengeni úshin, qorqytýǵa, psıhologııalyq jáne fızıkalyq zorlyq-zombylyqqa ushyrǵany anyqtaldy. Degenmen 2024 jyldyń naýryz aıynda jábirlenýshilerdiń biri polıtsııaǵa habarlasqan. Sonyń arqasynda qylmystyq shema ashylǵan. «Otbasylyq bıznestiń» úsh qatysýshysy da 7 jylǵa bas bostandyǵynan aıyryldy.
Buǵan deıin Mańǵystaýda Qoshqar ata ýly qaldyqtar qoımasynyń aınalasy kógaldandyrylatyny týraly jazǵan edik.