Aqtaýda muǵalimder eńbek demalysynyń aqshasyn ala almaı júr

AQTAÝ. QazAqparat - Aqtaýda keıbir mektep muǵalimderine áli kúnge deıin eńbek demalysynyń aqshasy tólenbegen, dep habarlaıdy QazAqparat tilshisi.

1 maýsymda eńbek demalysyna shyqqan keıbir mektep muǵalimderi aqshalaryn ala almaı, bilim basqarmasyna shaǵymdanǵan. Zań boıynsha qarjy olarǵa 3 kún buryn tolyǵymen tólenýi kerek. Alaıda, mektep dırektorlary men esepshileri qarajattyń joq ekenin aıtyp shyǵaryp salǵan.

«Men ózim 1 maýsymda shyqtym. Biraq mine, qansha kún ótti. Jartysy ketti ǵoı. Qyzymyzben birge demalýdy josparlaǵanbyz. Biraq, aqsha joq bolǵasyn, bilmeı otyrmyz. Kún saıyn mektepke qońyraý shalyp, surap otyrmyz. Qarajat joq, deıdi olar»,-dep shaǵymdanǵan ustazdyń biri.

Al, oblystyq bilim basqarmasy basshysynyń orynbasary Nurlybek Qoıjanov tólemderdi keshiktirý sebebin kassalyq baqylaý shotyndaǵy qarajattyń joqtyǵynan dep otyr.

«Bizdiń kinámiz joq, bul suraqqa jaýapty oblystyq qarjy basqarmasynan surańyzdar», dep jaýap berdi ol.