Aqtaýda meıramhana ıesi toı jasaǵany úshin 640 myń teńgege jýyq aıyppul tóleıdi
«Aqtaý qalasynda ótken toıdan túsirilgen vıdeomaterıal faktisi boıynsha jergilikti polıtsııa qyzmeti men taýarlar men kórsetiletin qyzmetterdiń sapasy men qaýipsizdigin baqylaý basqarmasynyń qyzmetkerleri saltanatty sharanyń ótken orny men onyń ıesiniń kim ekenin anyqtady. Atalǵan basqarma toıhananyń ıesin Ákimshilik quqyq buzý kodeksiniń 425-baby 1-bóligimen ákimshilik jaýapkershilikke tartý máselesin qozǵap jatyr. Mańǵystaý oblysynyń polıtsııa departamenti atalǵan sharany uıymdastyrýshylardy anyqtaý úshin jumys júrgizýde», - deıdi taýarlar men kórsetiletin qyzmetterdiń sapasy men qaýipsizdigin baqylaý komıtetiniń resmı ókili Erjan Baıtanaev.
Sondaı-aq, Mańǵystaý oblysy energetıka basqarmasynyń qyzmetkerine qatysty kópshilik sharany ótkizý faktisi boıynsha Ákimshilik quqyq buzý kodeksiniń 425-baby 1-bóligimen 30 AEK mólsherinde aıyppul salynyp, ákimshilik hattama toltyryldy.
Osy jaǵdaı boıynsha qazir Mańǵystaý oblystyq ákimshiligine jáne memlekettik qyzmet isteri jónindegi agenttik departamentine odan ári shara qoldaný jóninde resmı hat joldandy.
Sonymen qatar toı ótkizilgen orynnyń menshik ıesine qatysty da hattama toltyrylyp, 230 AEK mólsherinde aıyppul salyndy.
Esterińizge sala keteıik, Aqtaýda tyǵylyp toı jasaǵandardyń vıdeosy áleýmettik jelige tarap ketkenin jazǵan bolatynbyz.