Aqtaýda merzimdi qyzmetin aıaqtaǵan 600 teńiz jaıaý áskeri Jaýyngerlik týmen qoshtasty
AQTAÝ. KAZINFORM – «Batys» óńirlik qolbasshylyǵynyń áskerı bólimderinde belgilengen merzimdi qyzmetin aıaqtaǵan sarbazdardy zapasqa shyǵarý qurmetine arnalǵan saltanatty is-sharalar ótip jatyr. Bul týraly Qorǵanys mınıstrliginiń baspasóz qyzmeti habarlady.
Teńiz jaıaý áskerleriniń brıgadasynda 600-den astam áskerı qyzmetshi Jaýyngerlik týmen qoshtasty. Onyń bir bóligi kelisimshart boıynsha qyzmetin ary qaraı jalǵastyrmaq.
Sarbazdar bir jyl ishinde áskerı mamandyqty meńgerip qana qoımaı, azamattyq salada da qajet bolatyn praktıkalyq daǵdylarǵa ıe bolǵanyn basa aıtý kerek.
Brıgada komandıri podpolkovnık Azamat Súleımenovtiń aıtýynsha, qyzmet barysynda sarbazdar áskerı mamandyqty ıgerip, jaýyngerlik jáne memlekettik-quqyqtyq daıyndyqta turaqty nátıjeler kórsetti. Sondaı-aq «Aıbalta-2025» jedel-strategııalyq komandalyq-shtabtyq oqý-jattyǵýlary kezinde joǵary daıyndyq deńgeıin dáleldedi.
Gvardııa kishi serjanty Ádilet Balyqbaev brıgadadaǵy qyzmet ómirindegi mańyzdy kezeń bolǵanyn aıtady.
– Munda biz jaýapkershilikke, ata-anany syılap, dostyqty baǵalaýǵa úırendik. Qyzmet barysynda bizdi oqytyp, baǵyt-baǵdar berip, qoldaý kórsetken komandırlerge alǵys aıtamyn, - dedi ol.
Qolbasshylyq úzdik kózge túsken teńiz jaıaý áskerlerin gramotalarmen, estelik syılyqtarmen jáne ata-analaryna joldanǵan alǵys hattarmen marapattady. Birqatar áskerı qyzmetshilerge kezekti áskerı ataqtar berildi. Sonymen qatar, 15 áskerı qyzmetshi Qarýly kúshterde kelisimshart boıynsha qyzmetin jalǵastyrýǵa sheshim qabyldady.
Jalpy, Aqtaý garnızonynda aǵymdaǵy jyldyń sáýir-maýsym aılary aralyǵynda shamamen 1 000 adam zapasqa shyǵarylady. Olardyń basym bóligi qyzmet barysynda alǵan tájirıbesi men bastapqy kásibı daǵdylarynyń arqasynda jańa eńbek jolyn bastaıdy.
Budan buryn bıyl áskerı jıyndarǵa shaqyrylatyndar sany belgili bolǵanyn jazǵan edik.
