Aqtaýda mereke kúni alyp sábı dúnıege keldi

AQTAÝ. KAZINFORM - Aqtaýda mereke kúni Mańǵystaý oblystyq kópbeıindi aýrýhanasynyń perınataldyq ortalyǵynda alyp sábı jaryq dúnıe esigin ashty. 

Perınataldyq ortalyq mamandary názikjandylar qaýymynyń ataýly merekesi kúni 20-dan astam sábı ómirge kelgenin atady.

«8 naýryz kúni bizdiń ortalyqta 22 sábı jaryq dúnıege keldi. Onyń ishinde 13 ul, 9 qyz bala bar. Aıta ketetin jaıt, olardyń ishinde alyp er balany anasy aman-esen bosandy. Onyń salmaǵy - 5 keli 380 gramm. Al sábılerdiń arasynda eń jeńili 2 700 gramm shamasynda boldy. Ekeýi de er bala», - dedi Mańǵystaý oblystyq kópbeıindi aýrýhanasynyń baspasóz hatshysy Juldyzaı Qalıeva.

Kazinform tilshisine bergen suhbatynda Munaıly aýylyna qarasty Batyr aýylynda turatyn alyp sábıdiń anasy 37 jastaǵy Jańylsyn Jýmaǵambetova ulynyń esimin ózi qoıǵanyn aıtty.

«Bópeniń jaǵdaıy qalypty. Ózimniń de densaýlyǵym óte jaqsy. Nurdáýlet - bizdiń otbasydaǵy úshinshi bala. Buǵan deıin tuńǵysh ulym 4 kelige jýyq bolyp dúnıege kelse, qyzym 4,5 keli bolyp týdy. Sábıimniń jaǵdaıyn dárigerler jaqsy dep baǵalady. Ázirge osy perınataldyq ortalyqta bolamyz», - dedi Jańylsyn Jýmaǵambetova.