Aqtaýda merdiger jańa qubyrdyń ornyna eski, tot basqan qubyr salmaq bolǵan
AQTAÝ. KAZINFORM — Merdiger sý qubyryn jańartý jumystary kezinde eski qubyrlardy jańasyna aýystyrýdyń ornyna, qaıtadan tot basqan qubyrlar qoımaq bolǵan.
Bul jaǵdaıdy turǵyndar baıqap, jergilikti bılikke shaǵym túsirdi. Sonyń negizinde quzyrly organ tekseris júrgizgen.
Mańǵystaý oblystyq memlekettik sáýlet-qurylys baqylaýy basqarmasynyń basshysy Daýren Ótepqalıdiń aıtýynsha, tekserýdiń nátıjesinde birqatar zańbuzýshylyq anyqtalǵan.
— Aqtaý qalalyq qurylys bóliminen 8 jáne 15 shaǵyn aýdandarynda júrgizilgen sý qubyryn jańartý jumystary boıynsha, qurylys qaldyqtarynyń tazalanbaýy, ruqsatsyz qazý jumystary, sapasyz materıaldar qoldaný sııaqty zań buzýshylyqtar anyqtalǵany jóninde hat keldi. Osy atalǵan derekter dáleldenip, merdigerge QR Ákimshilik qylmystyq Kodeksiniń 309 jáne 312-baptary boıynsha aıyppul salynyp, bıýdjetke óndirildi, — deıdi basqarma basshysy.
Aıta keteıik, QR Ákimshilik qylmystyq Kodekstiń 309-baby — Qurylys jáne jóndeý jumystary kezinde aýmaqty zaqymdaý boıynsha aıyppul mólsheri jeke tulǵalarǵa — 35 320 tg, shaǵyn bızneske — 58 980 tg, orta bızneske — 98 300 tg, iri bızneske — 393 200 tg. Al, 312-bap — Qurylys zańnamasyn buzý boıynsha aıyppul shaǵyn bızneske — 786 400 tg, orta bızneske — 1 572 800 tg, iri bızneske — 2 752 400 tg.
— Al, eger merdiger kompanııa bir jyl ishinde taǵy da osyndaı zańbuzýshylyqtardy qaıtalasa, onyń qurylys júrgizý týraly lıtsenzııasyn keri qaıtarý máselesi sotta qaralady, — deıdi basqarma basshysy.
Buǵan deıin, Aqtaýda qubyr jarylyp, turǵyndar aýyz sýsyz qalǵany týraly jazǵan bolatynbyz.