Aqtaýda mektepterge baratyn joldardyń jaıy jurtty alańdatyp otyr
AQTAÝ. KAZINFORM — Aqtaýda jańa oqý jyly bastalǵaly mektepterge baratyn joldar men jaıaý júrginshiler jolynyń jaǵdaıyna qatysty turǵyndardyń shaǵymy kóbeıdi.
Atap aıtqanda, 19A jáne 32A shaǵynaýdandarynyń turǵyndary mektepke baratyn joldardyń jaı-kúıine alańdap otyr. Olardyń aıtýynsha, keıbir ýchaskelerde jóndeý jumystarynan keıin jol tolyq qalpyna keltirilmegen.
19A shaǵynaýdanyndaǵy № 24 mektep mańynda jazdan beri jol jıegindegi bir ýchaske qazylǵan kúıinde tur. Turǵyndardyń sózinshe, bul jerde jaıaý júrginshilerge arnalǵan qalypty jol joq, onyń ornyna topyraq úıindileri men qurylys qaldyqtary qalǵan.
— Jazdan beri osyndaı jaǵdaı. Joldyń boıynda topyraq úıilip jatyr. Oqýshylardyń oqý maýsymy bastaldy. Jaıaý júrginshiler jolyn retke keltirý qajet, — deıdi turǵyndar.
Al 32A shaǵynaýdanynda turǵyndar shaǵyn aýdanǵa kireberistegi negizgi joldyń jaǵdaıyna shaǵymdanyp otyr. Olardyń aıtýynsha, shamamen bir aı buryn jolda jóndeý jumystary júrgizilip, asfalt oıylǵan kúıi qalǵan.
— Bul jolmen № 29 mektepke balalaryn aparyp, alyp keletin biz kúnde júremiz. Sonymen qatar osy baǵytpen osy mańaıdaǵy jeke mektepterdiń oqýshylary da qatynaıdy. Jol jóndeý jumystary qashan aıaqtalady jáne jaıaý júrginshiler joly qashan retke keltiriledi, — deıdi turǵyndar.
Aqtaý qalalyq ákimdiginiń málimetinshe, 19 A shaǵynaýdanyndaǵy jaıaý júrginshiler joly qalpyna keltirilgen. Al, 32 A shaǵyn aýdanyndaǵy jol jóndeý jumystary jalǵasyp jatyr.
Buǵan deıin, Aqtaýda balalar jolaqysyn jalpy tarıf boıynsha tóleýge májbúr bolǵanyn jazǵan edik.
