Aqtaýda mektep oqýshysy Qazaqstan JOO-lary týraly mobıldik qosymsha jasap shyǵardy
AQTAÝ. QazAqparat - Aqtaý qalasynyń NZM 12-synyp oqýshysy Raqymjan Aımaǵambetov SchooldKZ mobıldik qosymshasyn oılap tapty. Onda Qazaqstan JOO-lary týraly málimetter jınaqtalǵan. Joba taıaý kúnderi «Infomatrix - 2017» kompıýterlik jobalary halyqaralyq baıqaýynda altyn medalǵa laıyqty dep tanyldy, dep habarlady «QazAqparat» HAA tilshisi.
Óz jobasy arqyly mektep oqýshysy barlyq mektep túlekterine bolashaq mamandyqty tańdaýǵa járdemdesedi. Raqymjannyń qosymshasy ázirge iOS platformasy bar smartfondarǵa ǵana keledi. Onda qazaqstandyq JOO-lar týraly tolyq aqparat bar.
Oqýshy bolashaq mamandyqty tańdaý kezinde qıyndyqtarǵa tap bolǵan soń oǵan qosymsha jasaý ıdeıasy kelgen.
«Sońǵy synyp - joǵary synyp oqýshysynyń ómirindegi eń mańyzdy da jaýapty kezeń. Ony «Qandaı mamandyq tańdasam? Kim bolam? Qaıda oqysam? JOO-ǵa daıyndyq deńgeıim qandaı?» degen suraqtar tolǵandyrady. Bizdiń mektepte kásiptik baǵdar beretin konsýltant bar. Ol mamandyq tańdaýda keńes beredi, unaıtyn mamandyqty alýǵa bolatyn ýnıversıtetterdi usynady.
Konsýltantta bolǵanymda kabınetinen ýnıversıtetter týraly býkletterge, túrli qaǵazdarǵa jazylǵan aqparattardy kórdim. Shynymdy aısam, qazir bul yńǵaısyz nusqa: aqparat tolyq, biraq shashyrańqy. Aqparatty tabý úshin kóptegen býkletterdi qoparyp otyrýyń qajet. Jelide de solaı. Saıtqa kirý qajet, ári kópshilik oqý oryndarynda tolyq aqparaty bar saıttar joq. Óz ıdeıamdy ınformatıka muǵalimi Altynbek Qarjaýbaevqa aıttym. Ol bizdi únemi qoldaıdy. Ol maǵan mobıldi qosymsha jasaýdy usyndy», - dedi Raqymjan.
