Aqtaýda mektep oqýshysyn bir top jetkinshek sabap ketti

AQTAÝ. KAZINFORM – Qatty soqqydan 15 jastaǵy jasóspirim aýrýhanaǵa jetkizilgen. Oqıǵa dúısenbi kúni bolǵan.

9-synyp oqýshysy mektepten shyǵyp, úıine bara jatqanda qarsy synyptyń úsh oqýshysy ony taıaqtyń astyna alǵan. Kastetpen uryp, jabylyp tepken. Saldarynan jasóspirim ortasha aýyr jaǵdaıda Mańǵystaý oblystyq balalar aýrýhanasyna jatqyzyldy.

Dárigerlerdiń aıtýynsha, naýqastyń jaǵdaıy ortasha, esin biledi. Em qabyldap jatyr. 
Osy oqıǵa boıynsha jasóspirimniń ata-anasy polıtsııaǵa shaǵymdanǵan. Polıtsııa departamenti baspasóz qyzmetiniń habarlaýynsha, qylmystyq is qozǵalyp, kúdiktiler anyqtalǵan.

— Janjaldyń barlyq qatysýshylary anyqtaldy. Kámeletke tolmaǵandar polıtsııaǵa ata-analarymen birge jetkizildi. Qylmystyq is boıynsha qajetti tergeý áreketteri júrgizilip jatyr. Sonymen qatar, barlyq qatysy bar quqyq buzýshylardyń ata-analarynyń nemese zańdy ókilderiniń jaýapkershiligi týraly másele qaralatyn bolady. Ákimdik janyndaǵy kámeletke tolmaǵandardyń quqyqtaryn qorǵaý jónindegi komıssııaǵa jiberý úshin materıal daıyndalyp jatyr. Barlyq kináliler profılaktıkalyq esepke alynady, — delingen habarlamada. 

Buǵan deıin, Semeıde 6-synyp oqýshysyn soqqyǵa jyqqan 3 jetkinshektiń áke-sheshesi ata-analyq quqyǵynan aıyrylǵany týraly jazǵan bolatynbyz.